adminCornelius Luphahla
INKOKHELI zeBinga ngaphansi kwenduna uSinamusanga sezisole izakhamizi zakule indawo ngokwendisa abantwana abangamantombazana bebancane okucina kubangela ukuthi inengi labo lingabi lekusasa elihle.Kubikwa izakhamizi ezinengi zakulo umango zisuka zephulele iziqu endlebeni nxa ziboniswa ngengozi yokwendisa abantwana bebancane zithi ngoba ngabantwabazo.
UMthunywa uxhumane lenduna yakule indawo uMnumzana Sinamusanga wachaza ukuthi sebeke baba lomhlangano wokuxwayisa izakhamizi mayelana lamalungelo abantwana kodwa kukhanya batshaya edwaleni.
“Sike saba lomhlangano wokuxwayisa izakhamizi ngokuthi ziphathe kuhle abantwana kodwa kukhanya kuyehlula. Sesize sabika loluhlupho lakukhomithi ekhangela ngamalungelo abantwana esigabeni kodwa lokhe kuqhubeka.
“Uthola umntwana oleminyaka yokuzalwa engu-14 endiselwe endodeni endala elemuli yayo, isiphetho ucina etshiywa asale sehlupheka. Ngiyamangala ukuthi kungani abazali bakhona bengakuboni ukuthi bona impilo zabantwababo,” kuchaza induna Sinamusanga.
UMthunywa ubuye njalo wakhulumisana lesinye isakhamuzi sakule indawo uNkosazana Portia Ndlovu olilunga lekhomithi ebona ngamalungelo abantwana oveze ukuthi umunyu ngesenzo esenziwa ngabazali.
“Into eyenziwa yizakhamizi zalapha ibuhlungu kakhulu ngoba abantwana ababendisayo bayabe bengakwazi lutho njalo kufanele ukuthi babe sesikolo.
“Abantwana laba bendiswa ngoba abazali babo befuna ukudla okucina kusenza babe labantwana labo bengabantwana,” kutsho uNkszn Ndlovu.
Uphethe ngokuthi sebebone kungcono ukuthi baphathisane lamapholisa ukuze kunqatshelwe umkhuba lo.
“Khathesi sesibone kungcono ukuthi sicele amapholisa asincedise ngokubopha abazali abavumela ukuba abantwababo bende bebancane kanye lokubopha labo abathatha labo bantwana,” kutsho uNkszn Ndlovu.
Online Reporter