admin
AKWANDANGA ukuthi umuntu okhuliswe ngendlela yesintu alandele leyondlela nxa esekhulile aze akwenze kube yiyo indlela aziphilisa ngayo. Abanengi bangakhuliswa ngalindlela bathi bangakhula bazenze bona abakhulela emadolobheni. Kuliviki hlangana lembongi yeFilabusi uThabani Dibi Sibanda (TS), okhule ngaphansi kwenduna uVezi Mafu Mathayi Maduna. Yazi ngcono ngalimbongi kungxoxo elandelayo.
ST: Sitshele ungubani, ovela ngaphi njalo udume ngani?
TS: Ibizo nginguThabani Dibi Sibanda ekhaya ngivela eFilabusi ngaphansi kwenduna uVezi Mafu Mathayi Maduna, ngiyimbongi .
ST: Ngamafitshane akusithi fahla ngembali yakho ngalumsebenzi owenzayo.
TS: Ngaqala ukuthanda izinto zesintu ngisesikolo kubanga eliphansi eMbembesi koGodlwayo. Ngakhula ngingumuntu olandela kakhulu imilayo yingakho ngihaya amaqhawe lamakhosi akithi ngemilandu abayenzayo esizweni sakithi.
ST: Usuke waloba inkondlo zakho phansi zadindwa?
TS: Yebo sengike ngabhala inkondlo zaphuma kuqoqo Sigiya ngolwethu, njalo ngiyingxenye yaBalobi bakithi.
ST: Usuke wahaya emicimbini emikhulu?
TS: Yebo ngelanga lokukhumbula inkosi uMzilikazi loJoshua Mqabuko Nkomo ngangihaya eSouth Africa.
ST: Abantu bayawujabulela yini umsebenzi wakho?
TS: Abantu abanengi bayawujabulela umsebenzi wami, esikhathini esinengi ngivame ukunxuswa emitshadweni ukuthi ngiyehaya izangelo zalabo abahlanganiswayo.
ST: Wena uhlukene njani lezinye imbongi?
TS: Mina ngihlukile kwezinye imbongi ngoba lokhe ngisadla ngoludala, ngiyinyosi ehaya umlandu wamakhosi lezibongo yiwo umehluko wami ngoba ngihaya into ezenzakalayo. Inyosi layo iseluhlwini lwezimbongi. Ngiyahaya inkosi uMzilikazi, uLobengula kunye lamaqhawe akithi afana laboJoshua Nkomo.
ST: Suke wathola isicoco ngomsebenzi owenzayo?
TS: Hatshi angikatholi isicoco, lokhu mhlawumbe kubangelwa yikuthi kangikabi lesikhathi eside ngiveze ubungcitshi bami, isikhathi sonke lesi bengilokhu ngilolonga.
ST: Ngaphandle kokuhaya imbongi ukhona omunye umsebenzi owenzayo?
TS: Ukhona omunye umsebenzi engiwenzayo, ngileqembu likamaskandi.
ST: Nhlupho bani osuke wahlangana lazo kule indlela yokuba yimbongi?
TS: Njengoba ngitshilo ngaphambilini ngisanda ukuqalisa indima le kungakho angikahlangani lenhlupho ezinengi.
ST: Kulezonhlupho ohlangane lazo zifundo bani ozitholileyo? Abatsha abafuna ukulandela indlela oyikhethileyo, zeluleko bani ongabanika zona?
TS: Abasaqalayo ngibakhuthaza ukuba balandele ubizo lwabo, bazimisele nxa sebethe baqala ukukwenza lokhu. Okunye engithanda ukuthi bakwazi yikuthi le yindlela yokuqinisa kanye lokuvuselela ulimi lwethu lwesiNtu nxa beloba inkondlo zabo.
Online Reporter