admin
Cornelius Luphahla
Inhlanganiso yeHunger Fighting Team evela koBulawayo sisungule uhlelo lokufundisa izakhamizi ngendlela zokulima kanye lokuthelela ikakhulu izivande ngenhloso yokwenqabela indlala esabelweni seMatabeleland.
Inhlanganiso le siqhube izifundo lezi esigabeni seLukampa esiqintini seMgazula eNkayi ngaphansi kukaSobhuku uMjuza Ndlovu lapho encedise khona izakhamizi ekusunguleni isivande semibhida, amatamatisi, ihanyanisi kanye lomumbu.
Iphephandaba likazulu livakatshele kulindawo lakhulumisana loMnumzana Richard Tshuma umngcinisihlalo walesisivande ochaze ukuthi isivande lesi basisungula ngemva kokukhuthazwa yile inhlanganiso.
“Isivande sethu sasisungula ngemva kokufundiswa kanye lokukhuthazwa ngabenhlanganiso yeHunger Fighting Team ukuthi silime senelise ukuziphilisa. Isivande lesi sisungulwe ngoMbimbitho kuwonalo umnyaka njalo inhlanganiso le yasipha inhlanyelo yemibhida kanye lempompi zokuthelelisa izilimo zethu,” kutsho uMnu Tshuma.
Uqhubekele phambili wathi inhlanganiso le yabafundisa njalo ukuthelela izilimo ngempompi ukuze singasebenzisi amanzi amanengi njalo singathwali nzima nxa sithelela.
“Lokhe sasisungulayo asisahlutshwa yisitshebo noma nje sihlaselwa yindlala nxa izulu lingananga kuhle njengalonyaka kodwa siyenelisa ukuziphilisa ngenxa yalesisivande,” kuchaza uMnu Tshuma.
Izakhamizi lezi zibuye njalo zachaza ukuthi i-Hunger Fighting Team yiyo eyazigebhela umgodi okuyikho ezikha khona amanzi okuthelela izilimo zazo kanye lawokunatha.
UMthunywa ubuye njalo wakhulumisana loNkosazana Chelesile Ndlovu omunye wamalunga alesisivande wachaza ukuthi balima izilimo ezehlukeneyo kulesisivande.
“Esivandeni sethu silima imibhida, amatamatisi, ihanyanisi njalo sesiqalisile ukulima umumbu. Izilimo esezivuthiwe yimibhida kanye lehanyanisi ngakho sizithengisela izakhamizini kanye lasezikolo. Khathesi sikhangelele ukuqhelisa isivande sethu ukuze senelise ukuthola inzuzo ephezulu ukwedlula esiyake siyithole,” kuchaza uNkszn Ndlovu.
Intatheli ibuye yakhulumisana njalo loNkosazana Simangele Ncube wachaza ukuthi balokujabula okukhulu ngesenzo abasenzelwa yinhlanganiso le.
“Silokujabula okukhulu ngentuthuko esiyilethelwe yi-Hunger Fighting Team ngoba khathesi sesisenelisa ukuzivikela endlaleni noma kungelazulu ngoba siyathengisa izilimo zethu sithenge ukudla,” kuphetha uNkszn Ncube.
Online Reporter