Online Reporter
Danisa Masuku
AMADODA amahlanu ayehlome ngamabhemba abulala iwindi lemota yohlobo lwe-Honda Fit andubana ahlasele abayisikhombisa ababephakathi koBulawayo bamiswe emthethwandaba besetheswa icala lokulimaza impahla kunye lamacala ayisithupha okutshontsha ehlomile.
UMpho Ncube, Thabani Zondo, Thembelani Sibanda, Ashton Ncube loShelton Ngwenya bamiswe phambi kukamantshi uMnumzana Mark Dzira ngoLwesibili.
Abahlanu laba bebemelwe ligqwetha uMnumzana Tinashe Runganga, oweTanaka Law Chambers.
Abahlanu laba balandule amacala akade bewetheswa benza isicelo sebheyili. UMnu Runganga uthe abasolwa ngeke babaleke ngoba bebelandela konke obekufunwa ngamapholisa ngesikhathi kuchwayisiswa ngecala leli.
Uthe abasolwa banike amapholisa ikheli zabo kungakho banganikwa ibheyili bazahlala kumakheli abazawanika inkundla.
Umtshutshisi kulelicala uSiphiwe Mhlanga walile ukuthi banikwe ibheyili esithi abasolwa bebesebenzisa izikhali eziyingozi ezigoqela amabhemba, ingqamu zohlobo lwe-Colombia kunye lamatshe ukubulala amafasitela emota njalo bayingozi emphakathini.
Uthe ukulimaza impahla licala elilesigwebo esingangeseminyaka elitshumi kukanti ukutshontsha behlomile khona kungaba lesigwebo seminyaka engu-20.
Ngaleso sizatho kulengozi yokuba abetheswacala bangabaleka besesaba ukuyapika ejele.
Abahlanu laba bakhangelelwe ukuphenduka emthethwandaba mhlaka 5 Mpandula.
