Online Reporter
Lovemore Dube
ABAGIJIMAYO abayizizalwane zakuleli abahlala eMelika baqale umnyaka bebalelwa kulabo abenza kuhle emhlabeni wonke jikelele.
Okhokhela abagijimayo laba nguVimbayi Maisvoreva ozibambileyo kumjaho we-400m njalo obelilunga leqembu elagijima eTokyo elizweni leJapan kumaWorld Championships nyakenye.
UMaisvoreva nguye njalo ophethe i-national record kubanga leli. Ugijime isikhathi esiyi-52,44 seconds kuviki eledluleyo. Lesi isikhathi simenza abenguye ophambili kubo bonke abeZimbabwe, kodwa ekunombolo yesine emhlabeni wonke jikelele lonyaka.
Imidlalo yokugijima iqale kuviki eledluleyo phetsheya kugijinywa kunkundla ezivalelweyo (Indoor Track).
UDenzel Simusialela owasuka koBulawayo esiyafunda lokugijima kweleMelika laye kukhanya kuhambela kuhle. Uqale umnyaka nge-6,64 seconds ku60m okumenza abe ngowesi-34 kwabaphezulu.
USimusialela ukugijima kwakhe kungathi kuhamba kuhle njalo ukhangelelwe ukuthi angaphathisana loMakanakaishe Charamba loTapiwanashe Makarawu kumdlalo we4x100m relay.
Usetshengisele ukuthi lonyaka uzimisele ngoba le-200m useyigijime nge-21,06 seconds okuyisikhathi esihle nxa kugijinywa lapho okugubuzele khona.
Ku200m ongowesi-17 kwabalezikhathi eziphezulu.
UTafadzwa Chikomba oyeqa i-long jump njalo agijime ibanga elifanayo nge-6,72 seconds, okuyisikhathi esingasibi kangako njalo ungowesi-88 kumhlaba wonke jikelele.
U-Alpha Mpofu ku-300m wenza kuhle. Isikhathi sakhe se-33 seconds simenza abengowesi-16.
Kukanti uTinotenda Matiyenga laye uyigijime nge-34,32 seconds, okumenza abengowesi-81.
Oweqa i-triple jump laye eseMelika uTheophilus Mudzengerere weqe i16,39m. Ibanga leli lingelesihlanu kwaphezulu emhlabeni wonke.
UTafadzwa Chikomba oweqa i-long jump uqale umnyaka kuhle nge-7,83m engeyesitshusmi lanye emhlabeni.
Kumnyaka odluleyo uCharamba loMakarawu benza kuhle ku200m egijinywa phakathi kwenkundla evaliweyo babalesikhathi se-20,13 seconds esasiphezulu kulazo zonke.
Babangamalunga eqembu elaya kumaWorld Championships eJapan.
Kabadanisanga lakhonale.
UMakarawu waba ngowesikhombisa ku-final kukanti uCharamba wakhutha ngendawo eyodwa ngoba kuma-semi-final wasala engowesi tshiyagalunye.
