adminINENGI lezimuli zakulezinsuku sezikhula nje zingagcwalanga ngoba obaba bengekho loba nje abazali sebethe behlukana batshiya izingane zabo labomama loba labobaba. Inengi labazali liyalibala ukuthi ukuba ngumzali akupheleli ekuthatheni incwadi yokuzalwa kodwa-ke kuyahamba kuze kufike kusibanga sokuthathwa-ke kwesithupha.
Loba-ke ubaba engekho konke kukhona isigaba esidinga ubaba ukuze umntwana athole-ke isithupha njengoba eyabe eseleminyaka elitshumi lasithupha. UHulumende sowasiqakathekisa kakhulu isithupha, yikho nje izikolo ezinengi azisavumi ukuba umntwana abhale imihloliso yelizwe engelaso isithupha njalo isithupha sisebenza kakhulu lalapho umntwana esephatheka kumincintiswano yasesikolo efana leyokugijima, ukudlala ibhola lokunye nje okunengi okutholakala ezikolweni. Isithupha siqakathekile kakhulu emuntwini wonke nje jikelele.
Kule iviki ngithole ithuba lokuphathisana lojaha okuthiwa nguFikile Gumpo. UFikile wazalwa ngunina uSibuyile kanye loyise uTendai owayevela ekhaya eMasvingo lapho ayezalwa khona njalo ethathele khona isithupha. Abazali bakaFikile benelisa ukubana bamthathise incwadi yokuzalwa kodwa basuka behlukana. Ekuhlukaneni kwabazali uFikile wasala-ke esehlala logogo ozala unina.
Unina kaFikile yena wasuka waqonda eGoli ethi uzama ukuthola okungamphilisa khonale ukuze enelise ukugcina uFikile. Ngokuswelakala kwenhlanhla laye uNakaFikile wafika wadliwa zindunduma zaseGoli. UTendai laye kaziwa ukubana wasuka wayangaphi. Ugogo wazikhulisela-ke umzukulu wakhe wafunda waze wafika ebangeni lefomu yesine. Inkinga yaqala ukuvela ngoba esikolo kumele uFikile abhale eselaso isithupha. Umthetho weZimbabwe uthi lapho suthatha isithupha kumele wazi uSobhuku wekhaya lapho ovela khona kanye lenduna, njalo kumele ubelesithupha somzali ohlala laye kanye lencwadi eveza lapho ohlala khona.
Kwabanzima-ke ukuba uFikile athathe isithupha ngoba kwakufuneka ukuba azi induna losobhuku wekhaya lapho uyise avela khona. Wazama-ke ukubhoda labomakhelwane ezama ukubuza ukubana induna losobhuku beMasvingo ngobani. Kwaze kwadlula inyanga elokhe edinga uFikile kodwa engela lutho alutholayo olungamphathisa ukubana athathe isithupha. Weza kunhlanganiso yaseTrinity ezodinga usizo ukuze athathe isithupha enelise ukubana alobe imhloliso njalo azilungisele ikusasa elihle. Lathi-ke njengeTrinity sabhoda satshaya lencingo saze sabathola osobhuku lenduna zaseMasvingo. Wagijima uFikile waqonda emahofisini wenelisa ukubana athathe isithupha.
Kuyinto ejabulisayo ukubana abantu basizakala enhlanganisweni yethu. Ngiloba nje uFikile uloba imihloliso yakhe njengabo bonke abantwana abalabazali babo.
Kasihlanganeni njalo ngeviki ezayo.
Umlobi utholakala kukheli ethi [email protected] loba kunombolo ezithi 0773165055.
Laku www.trinityproject.biz
Online Reporter