Online Reporter
Imicimbi yabesifazane efana leDoek & Slay yenzelwe ukuthi omama labesifazane bahlangane, bazijabulise, bagide, bakhululeke emthwalweni wempilo yansuku zonke.
Kodwa okwenzakale eGlamis Arena eHarare ngeSonto kufanele kube yisifundo kubo bonke abesifazane mayelana lokunatha utshwala okwedlulisileyo.
Ngokwemibiko yemthethwandaba, abesifazane ababili babhekene lamacala amane okutshaya ngemva kwezinsolo zokuthi bahlasele abanye abesifazane emcimbini, phakathi kokunye besebenzisa amazinyo ukuluma abebebahlasela. Bobabili banikwe ibheyili njalo bazaphindela enkantolo ngoMpandula 3.
Kuyadabukisa ukubona umcimbi obekumele ube yindawo yokuzithokozisa uphenduka indawo yokuxabana lokulimazana. Akufanelanga ukuthi utshwala busenze sikhohlwe ukuthi singobani, ukuthi siphetheni empilweni, lokuthi izenzo zethu zingaba lemiphumela emibi.
Kumele sikhumbule ukuthi ukuzithokozisa akutsho ukulahlekelwa yikuzithiba. Ukunatha kuyisinqumo somuntu, kodwa ukunatha ngokweqileyo kungaphazamisa ukwahlulela, kwandise ingxabano futhi kubangele umuntu enze izinto angasoze azenze enganathanga.
Abesifazane kumele bazibuze: Ngizazizwa njani ngesenzo sami kusasa? Abantwabami bangezwa njani bangabona engikwenzayo abalingani bami ke kumbe engisebenza labo bangathini bangangibona nginje?
Owesifazane akumelanga azikhohlwe angangena emcimbini kumele akhumbule ukuthi kulekusasa. Kumqoka ukukhumbula ukuthi ungumama, ungudade, uyisisebenzi kwenye indawo, ungumholi njalo ungumuntu olesimo sokulondoloza. Lokho akutsho ukuthi abesifazane kabavunyelwa ukuzithokozisa, kodwa kutsho ukuthi ukuzithokozisa kufanele kuhambisane lokuzihlonipha.
Abahleli bemicimbi labo kumele badlale indima yabo ngokuba lendawo ephephileyo, ukulawula ukuthengiswa kotshwala, ukulondoloza ukuphepha lokungenelela masinyane nxa kusiba lokuxabana.
Kodwa ekucineni, umthwalo usemahlombe ethu. Nathani, nxa likhetha ukunatha, kodwa nathani okulingeneyo. Zijabuliseni, kodwa lingalahlekelwa yisithunzi senu. Jabulani ligiye, lihleke, licule, lithathe izithombe — kodwa kusasa livuke lisakwazi ukuziqhenya ngendlela eliziphathe ngayo.
Imicimbi le kufanele ihlale iyindawo yokuphakamisa omama, ubungane lokuphila, hatshi indawo lapho utshwala buguqula abantu babe yizilo. Sonke singazikhethela ukuthi sizakuba yisibonelo esihle yini, kumbe sibe yindaba esizazisola ngayo kusasa.
Ukuzithokozisa kulungile. Ukuzithokozisa uze ulahlekelwe yikuzithiba akulunganga.
