Online Reporter
Kulengxoxo akade ngiyilalele kuphikisana abadala, uyazi lawe nxa kuzavuka kulomngcwabo kuvamile esintwini ukuthi kungalalwa, abantu behlabela kuze kuse.
Amadoda ayabe ehlezi ehanqe iziko kuphikisanwa ngalokhu lalokhuyana. Kukhulunywa ngezombangazwe, ezemidlalo lokunye okunengi. Phela wonke oyabe elapho uthi uyazi ngcono kulomunye.
Yaphakama enye indoda, ilizwi lihayiza kuzwakala ukuthi ngumuntu oke wanatha uMagwebu. Indoda le yathi eZimbabwe kulezigaba zabantu abathathu kulabazalwa ngesikhathi seRhodesia, labazalwa ngemva kokuthola uzibuse kuzokuba njalo labazalwa ngemva kuka-2000 ababizwa ngokuthi ngama 2K.
Lindoda yayiqathanisa ukwehlukana ngezenzo kwalezi zigaba zabantu, wathi abazalwa ngesikhathi seRhodesia yibo abantu kuzwa ngoba balumela uchuku lwamabhunu baze bathatha izikhali bangena igusu bethungatha amabhunu belwisa umbuso woncindezelo baze bathola uzibuse. Waveza njalo ukuba babelezibindi.
Eqeda lapho waveza ukuthi labo abazalwa ngemva kukazibuse, inengi labo yibo abafundileyo elizweni basebenza lapha lalaphaya bona wathi balesibinjana. Wasesithi ama-2K, inengi labo bahlakaniphele eceleni njalo bathanda izinto, abafuni njalo lokusebenza nzima.
Bathanda injabulo, nxa belemali bahamba kuze kuse kungenwa emahoteleni lendaweni zokuzithokozisa okubizwa kuthiwa ngama night club ngolimi lwabondlebe zikhanyilanga, lapho kuyabe kugidwa kusenziwa lezinye izinto ezingaqedakaliyo.
Waqhubeka ethi nxa bengatshiyelwa ilizwe bebodwa, ngeke balithathe mango ukuthi balivuthuze libe zintshaka. Kuthiwa inengi labo ungabaqhatsha emankampanini bayitshontshela leyo nkampani besebenzisa amakhompuyutha ize ivalwe ngci basuke lapho babaleke baye emazweni.
Bathi njalo inengi labo abasalandeli amasiko, bamitha bebancane njalo lomendo abasawuqakathekisi nanku phela bavame ukukhombisana kubomakhalekhukhwini bona bengazani mathupha, inengi labo baba labantwana abalezibongo ezitshiyeneyo.
Kulutshwane okuhle okwakhulunywa yile indoda, ababekhona bazama ukuthi baphikisane layo kodwa yakhanya ibakhulela ngemicijo njalo lenengi labantu elalihleli eziko lavumelana lalindoda, kwaze kwatsho leyinye layo eyathi ama 2K inengi labo ngamamenemene wodwa bayazipha lezicoco zemfundo, aqhatshwe enkampanini abengumaqhuzu, khona lizakunanzelela sekulaphaya ukuthi ukwenza kwakhe lokukuzathifikhethi kuyatshiyana.
Yadonsa lindaba kwaze kwasa, kwalamula umfundisi owathi kukhothanyiswe amakhanda kukhulekwe ngoba umsebenzi usuqala. Ayixabene!
