Online Reporter
Nkosilathi Sibanda
ISIFISO sabalandeli abanengi beHighlanders sigcwalisekile ngoMgqibelo ekuseni kubikwa ukuthi iqembu selehlukane lomqeqetshi uPieter De Jongh.
Kube yinjabulo kwabanye ngoba kabazange basuthiseke ngendlela aqeqetsha ngayo. IBosso iqede isizini iqhula, isibalelwa kulezo eziqunywa lizembe.
Inkokheli zeqembu zikhiphe isaziso ngokwehlukana loDe Jongh.
“IHighlanders Football Club ithanda ukubika ukuba ngemva kokuxoxisana lokuvumelana lomqeqetshi uPieter De Jongh, iqembu linqume ukuthi lingeluli ikontileka lomqeqetshi, ephela mhlaka 31 Mpalakazi 2025.
“Iqembu lethula ukubonga kwayo okuqotho kumqeqetshi u-De Jongh ngobungcitshi bakhe lokuzinikela. Siyambonga ngokusebenza nzima. Simfisela okuhle kwelizayo. Iqembu lizakwazisa ngesimo sabaqeqetshi besizini ka’2026,” kutsho lumbiko.
