Online Reporter
Munyori weKwayedza
MUNYORI weKariba District uyo zvakare akafanobata chigaro chemukuru weRural Infrastructure Development Agency (RIDA) mudunhu iri, Ignitious Chiome, akamiswa mudare ndokuvharirwa mutirongo nekuda kwetsaona yechikepe cheMbuya Nehanda iyo yakaurayisa vanhu 97 muLake Kariba nguva pfupi yadarika.
Chiome akamiswa mudare reKariba Magistrates’ Court nemusi weChitatu achipomerwa mhosva yekukonzeresa kufa kwevanhu ava.
Acharamba ari mutirongo kusvikira musi weChina, apo chikumbiro chake chekuti apihwe bhero chinozonzwikwa mudare iri.
Hurumende inoti kutakura vanhu vakadarikidza mwero wechikepe, kutadza kushanda kwacho zvakanaka uye kushaya hanya nekuona mafambiro ebasa anotarisirwa ndizvo zvakakonzeresa njodzi ya11 Nyamavhuvhu apo chikepe ichi chakanyura muLake Kariba
Chikepe ichi chine makore 41 chichishandiswa uye chinonzi chaive chakatakura vanhu vanosvika 180 nezvinhu zvinorema, kunyangwe chiine mvumo yekutakura vanhu 90.
Kuferefetwa kwenyaya iyi kuri kuenderera mberi uye vachuchusi vanoti zvinoratidza kuti kuchasungwa vamwe vanhu vane chitsama vane chekuita nenjodzi yakaitika iyi.
