Online Reporter
Muchaneta Chimuka
CHIKWATA cheZimbabwe Prisons and Correctional Service (ZPCS) svondo rapera chakaitirwa mabiko emuonekedzano, apo chaienda kunokwikwidza kumitambo yeSADC Corrections/Prisons/Penitentiary Services Sports and Cultural Games iri kuitwa kuWindhoek, kuNamibia.
Mitambo iyi, iyo inosanganisira nhabvu, volleyball nenetball, yakatanga nemusi wa4 Nyamavhuvhu uye ichapera musi wa8 Nyamavhuvhu.
Vachitaura pachiitiko ichi svondo rapera, ZPCS Commissioner-General Moses Chihobvu vanoti vane chivimbo chokuti chikwata ichi chichanomirira Zimbabwe zvine mutsindo.
“Mitambo iyi haangori makwikwi bedzi asi kuti mukana mukuru wekuratidzira zvipo zvenyu nekusimudzira mabasa anoitwa mukuchengetedzwa kwevasungwa munyika muno pamwe nedzimwe nyika dziri muSADC, uye isu tichidzidzawo kubva kunyika idzodzo munyaya dzemitambo,” vanodaro.
Vanokurudzira nhengo dziri kukwikwidza kuti dziite mitambo iyi nemwoyo wose, dzisimudzire mureza weZimbabwe munyaya dzemitambo.
“Mukana wokuti munge muchienda kunokwikwidza kunyika iyi hauna kuuya nhando asi kuti mucherechedzo wokuti makagona kuratidza unyanzvi hwenyu. Saka, endai munoratidza zvidavado zvenyu, musimudzire mureza wenyika yenyu nenzira ine rudo neruremekedzo,” vanodaro.
Comm-Gen Chihobvu vanoti vari kutarisira kuti chikwata cheZimbabwe chinge chichiunza menduru yegoridhe uye vachange varipowo mukuvatsigira pamakwikwi aya.
“Tinoramba tichikomekedza kuti murambe makazvibata nekuzvipira. Hatidi vanhu vanotora zvinodhaka nokuti kuita kwakadaro hakutenderwi munyaya dzemitambo zvachose sezvo kunokanganisa utano, zvipo nemabasa enyu uye kunodzikisira unhu nechimiro cheZPCS. Kuvatyairi, ndinoti fambai nechikwata chedu zvakanaka kudakara vadzoke murugare,” vanodaro.
