Online Reporter
Munyori weKwayedza
MUTUNGAMIRIRI wenyika, President Mnangagwa, munguva pfupi iri kutevera vachaparura chirongwa chemagetsi anoshandisa simba rinobva muzuva chePresidential Solarisation Programme icho chine donzvo rekubatsira mhuri dzinodarika 200 000 munyika yose.
Vachitaura kuvatori venhau mushure mekupera kwemusangano wedare reCabinet nemusi weChipiri chino, gurukota rezvekuburitswa kwemashoko nenyaya dzenhepfenyuro, Dr Jenfan Muswere, vanoti chirongwa ichi chiri kusimudzira raramo yeveruzhinji, kunyanya kumaruwa panguva iyo Hurumende yeSecond Republic iri kushanda nesimba mukuvhara mukaha uripo pakati pemaruwa nemadhorobha maringe nebudiriro.
Vanoti Cabinet yakakurukura pamusoro pegwaro rePresidential Solarisation Programme Report iro rakaturwa negurukota rinoona nezvekuchengetedzwa kwenyika, Cde Lovemore Matuke.
“Zvichitevera kupihwa mvumo kwakaitwa maringe nekufambiswa kwechirongwa chePresidential Solarisation Programme munaZvita 2024, pane budiriro huru yaitwa yakanangana nekuisa magetsi anoshandisa simba rinobva muzuva mudzimba dzinodarika 200 000,” vanodaro.
Dr Muswere vanoti chirongwa chekupa chenjedzo kune veruzhinji munharaunda pamusoro pepurojekiti iyi, icho chaitungamirirwa nemakurukota anomirira Hurumende kumapurovhinzi akasiyana, chakatopera kuitwa.
Vanoti vechidiki vakapedza dzidzo yeYouth Service in Zimbabwe, vachibatsirwa nenyanzvi kubva kuHarare Institute of Technology neRural Electrification Agency, vachaisa magetsi anoshandisa simba rezuva kudzimba dzinodarika 200 000 idzo dzichasarudzwa.
“His Excellency President Cde Dr E.D. Mnangagwa vachaparura chirongwa chePresidential Solarisation Programme senzira yekuti chichitanga zviri pamutemo mugore racho rekutanga,” vanodaro Dr Muswere.
Kuburikidza negwaro reRenewable Energy Policy, iro rinokurudzira kushandiswa kwesimba remagetsi rinobva muzuva nezvimwe, Zimbabwe ine chinangwa chekubura magetsi emhando iyi anosvika 1 100MW.
Chirongwa chePresidential Solarisation Project ndechimwe chine chinangwa chekuzadzikisa shuviro iyi uye panguva imwechete chichiwanisa mabasa kumaruwa izvo zvinoenderana nemuono weVision 2030 wekuti veruzhinji vave nehupenyu hwepamusoro.
Pasi pechirongwa ichi, dzimba dzinodarika 200
000 dzinotariswa kuiswa magetsi anoshandisa simba rinobva muzuva pagore uye chichaitwa kwemakore mashanu, kutanga gore rino.
Bazi reRural Infrastructural Development Agency (RIDA) richaona mafambisirwo echirongwa ichi kuburikidza nekomiti yeInter-Ministerial Steering Committee iyo inosanganisira nyanzvi dzekumayunivhesiti emuno.
Vechidiki nevanhukadzi vemunharaunda vachadzidziswawo kuita basa rekuisa magetsi aya munzvimbo dzavanogara.
