Online Reporter
Abel Ndooka
SANGANO reKyokushin Budokan Zimbabwe, rakabatana neHarare City Martial Arts Club, rinoti kuuya kwenyanzvi yekarate yepasi rese – Hanshi Hennie Bosman – svondo radarika kwakabatsira zvikuru vatambi kuti vawane ruzivo rwakadzama rwemutambo uyu.
Hanshi Bosman, uyo anove chizvarwa chekuSouth Africa uye achitungamira sangano reInternational Kyokushin Budokan, akauya muZimbabwe akaitisa zvidzidzo zvemutambo uyu. Izvi zvakaona vatambi vekarate vanodarika 150 vanobva kumapurovhinzi akasiyana vachiuya kuzodzidza kubva kwaari.
Munyori mukuru weKyokushin Budokan Zimbabwe pamwe neHarare City Martial Arts Club – Sempai Piniel Nzvenga – anoti sesangano vakabatsirikana zvikuru nekuuya kwaHanshi Bosman.
“Svondo radarika, paive nevatambi vanodarika 150 vakauya kuzodzidza kubva kuna Hanshi Bosman pamutambo wataive nawo uyo taiitira kuCity Sports Centre muHarare.
“Takave nenguva yakanaka uye takadzidza zvakawanda kubva kwaari izvo tine chivimbo chekuti zvichabatsira kusimukira kwemutambo uyu munyika yedu mune remangwana.
“Zvikuru zvatakadzidza kubva kuna Hanshi Bosman izvo zvinosanganisira matambirwo emutambo uyu, nzira dzinotibatsira kuti tihwine mumitambo yakasiyana nekuridza pembe zvemhando yepamusoro,” anodaro Sempai Nzvenga.
Anoti munaKubvumbi, seKyokushin Budokan Zimbabwe vacharonga mutambo muno uyo uchauya vatambi vakawanda vachakwikwidza vachishandisa ruzivo rwavakawana kubva kuna Hanshi Bosman.
“Izvi zvichatibatsira kuronga zvikwata zvedu nekuti munaNyamavhuvhu takashevedzwa kumutambo mukuru uri kuCape Town, kuSouth Africa uyo uri kurongwa naHanshi Bosman,” anodaro Sempai Nzvenga.
