marble nkomo
Kuyonale iviki umphakathi uthuthumeziswe zindaba ezibuhlungu zentombazana eleminyaka engu-16 yeNguboyenja koBulawayo ezibulale ngokunatha itshefu ngemva kokuthola ukuthi kayenzanga kuhle kuzifundo zayo ze-O-level zika-2025.
Isehlakalo lesi esibuhlungu siyisikhumbuzo sokuthi kunengi abantwana abakuthweleyo ezifubeni zabo abehluleka ukuthi bakukhiphe kumbe sithi baswela owokukhulumisana laye kwezinye izikhathi nxa bethe bahlangana lobunzima empilweni.
Lokhu kuyadabukisa nanko phela impilo yalumntwana imane yaqunywa, masinyane akwaziwa ukuthi ubezakhula abeyini ebizaba lusizo ebazalini bakhe kanye lesizwe.
Abazali kumele bazi ukukhulumisana labantwababo ngaloba yiphi indaba ukuze bazizwe bekhululekile nxa sebehlangane lobunzima.
Kuqakathekile njalo ukuthi abazali bakhuthaze abantwana ukuthi bayabathanda kungakhethekile ukuthi bayaphumelela kunhlangothi ezitshiyeneyo zempilo zabo.
Kumele ababalisi labo badlale eyabo indima ekufundiseni abafundi ukuthi ungaze wehluleke esikolo ithuba lokuphinda likhona, akusikho kuphela kwakho.
Abantwana kumele bazi ukuthi akumelanga besabe ukudanisa abangakibo ngoba akukho enye into eqakatheke njengempilo yabo.
Akukho okungenza abantu badane baze bakulahle. Okumqoka yikuzibutha uzame njalo.
Okunye okumele abantu bahlale bekwazi kugoqela bona abafundi yikuthi abantu baphiwa izipho ezitshiyeneyo nguMdali kungakho-ke kwesinye isikhathi umuntu uyabe elamanye amathalenta ngaphandle kwezifundo kungakho kumele sikuqaphele lokhu sazi ukusiza abantwabethu bangalahlekelwa lithemba.
Abantwana abanengi balesiphiwo esikhulu emisebenzini yezandla, kwezemidlalo kanye lokunye okutshiyeneyo.
Kulezinsuku kunengi umuntu angakwenza.
Ukuzibulala akusizi lutho, kutshiya abaseleyo belezinhlungu ezingapholiyo. Ngaphandle kwalokhu uMdali akakufuni ukuthi siqume impilo zethu, wonke umuntu ulesikhathi sakhe.
Indima yethu yikukhuthaza siphinde sicebise abantwabethu ukuze bangabi lokuzisola kakhulu baphelelwe lithemba nxa kuthwe kwaba lokuthize okungahambanga ngendlela.
Ithuba lokuzama njalo lisekhona kungakho-ke asikhangeleni impilo sinanzelele ukuthi iligugu kungakho kumele siyilondoloze ngazo zonke indlela.
Online Reporter