admin
Muchaneta Chimuka
SANGANO remadhokotera reMédecins Sans Frontières (MSF) International rinoti rakatumira chikwata chemachiremba kunobatsira zviuru nezviuru zvevanhu vakawirwa nenjodzi yemafashamu emvura yaive dutumupengo kudunhu reManicaland.
Dr Marthe Frieden — avo vanova mutungamiriri wechikwata ichi — vanoti kusati kwauya mafashamu aya, vagara vachibatsira vanhu veuku pasi pechirongwa chekurwisa zvirwere zveBp neshuga kuChipinge vachibatsirana nebazi rezveutano nekurerwa kwevana.
“Pamazuva matanhatu ekutanga, takaenda tiri chikwata chevanhu gumi veMSF kunobatsira vanhu vaitambudzwa nemafashamu tichibva tambosiya chirongwa chatainge tiri kuita kuChipinge,” vanodaro.
Vanoti dambudziko guru ravakasangana naro nderekushomeka kwemishonga yekurapa varwere.
Mubasa ravo, vanodaro Dr Frieden, vakabatana nemamwe mapoka mukubatsira vanhu vakawirwa nenjodzi iyi.
“Vamwe vaive nemaronda akadzika uye vamwe vaiunzwa nendege vakatyoka mabhonzo saka vaizopfuudzwa kuendeswa kuzvipatara nemaamburenzi apo isu taiendesawo vamwe vainge vasina kunyanya kukuvara kuChipinge District Hospital chinova chinhambwe chemakiromita angaite 50 kubva paSkyline, kuChimanimani,” vanodaro.
Online Reporter