adminnaCleopatra Shurugwi
Kana yoturuka
Yoita zvayo zviye
Iwe rima nomoyo
Unonzwa mandichazoti ndoti
Yowe-e apa bate apa siye
Akazvara matife nenzara.
Paye panonyudza
Panoda mupunga
Chibage chinoshapudza
Chiramba kupakata
Choita setsunga
Nzara yon’en’ena
Ziva ivhu mwana wevhu.
Simbe kumujuru
Vakadaro vakuru
Anodyara nyama
Achakohwa kuora
Badza harina warakauraya
Asi rakatounza hupenyu.
Cleopatra Shurugwi ari muForm 2 paChitepo Secondary School, kuMarondera.
MAONERO:
Musoro wenhetembo iyi wakanaka zvikuru nekuti hautambise mashoko, asi unobva wangoti ga! Asi ipo pakungoti ga ipapo, uri kukoka vaverengi nevatereri kuti vade kuziva kana kubvunza kuti rinombova riiko riri kunzi hariuraye? Saka izvi zvinovakwezva kuti vade kuterera kana kuverenga kuti vanzwe zvakawanda.
Ndinofara nekuchenjera kwanyanduri Cleopatra Shurugwi. Kana mukacherechedza ndima yake yekutanga, ari kutaura nezvekunaya kwemvura zhinji, asi hapana paanombonyatsodudza kuti “mvura”. Anoita kuti vaverengi vabva vanyatsogutsikana kuti pari kutaurwa zvemvura zhinji paanoti: Kana yoturuka,
Yoita zvayo zviye.
Apa hapana mubvunzo kuti mvura iri kutaurwa yakaita sei. Imvura zhinji iri kunaya nenzira inozadza nzizi nekupa hupenyu kumbesa nevanhu.
Saka ndizvo zvinobva zvaita kuti kuraira kwanyanduri kureve chinhu paanoti, “Iwe rima nomoyo.” Ari kuti denga raita paro, saka iwewo chiitawo pako. Asi anobva ayambira dambudziko rinokonzerwa nevaye vanoverengera paanoti:
Unonzwa mandichazoti ndoti,
Yowe-e apa bate, apa siye.
Nyanduri uyu mudhumeni chaiye, nekuti ndima yake yechipiri yanangana nekupa ruzivo kuti vanhu vabudirire sevarimi. Ndizvo zvaita kuti ati, “Ziva ivhu mwana wevhu.” Chaari kuyambira kuti kungorima nemoyo asi usina ruzivo hakubatsire. Ave kunyeurira vaverengi kuti vazive nzvimbo dzinoita uyewo nembeu dzinorarama imomo.
Pakupedzisira, mudhumeni-nyanduri wedu anoenda kunotora mashoko kubva muBhaibheri rinoti simbe iende kunodzidza kubva kumujuru. Nyangwe zvazvo Bhaibheri richishandisa chirevo chekudyara nyama nekukohwa kuora neimwewo nzira, pano nyanduri ari kutaura pamusoro penungo chaidzo. Izvi ndizvo zvinoita kuti apedzise achiti badza harina warakauraya.
Nhetembo yake yakanaka nekuti inonakidza uye yakareruka, asi ichitaura zvinhu zvakadzama kwazvo. Anogonawo kutamba nemazwi nenzira inonwisa mvura, uye kushandisa mabvumira nehochekoche. Chinhu chinongoda kugadziriswa nanyanduri-mudhumeni kuziva mashandisirwo ezvimiso. Asi ramba uchinyora nekuti une chipo Cleopatra.
Online Reporter