Online Reporter
Mthokozisi Ncube
ZITHITHIBELE izakhamizi elokitshini leNkulumane koBulawayo kulandela ukutholakala kwesalukazi sibhunyumunyu phakathi kweguma lomunye umuzi.
Isalukazi lesi, uLucy Ngwenya kubikwa ngowesiqintini seMadlelenyoni eNtabazinduna. Utshele izakhamizi ebezibuthene ukuthi wawa kungcebethu ngesikhathi endiza labanye bakhe, bekuhambo lokuthakatha, bamtshiya.
Lesi isiga esimangalisayo senzakale ngehola lesine ekuseni, kwenye indlu eseduzane lehofisi yekhansili eNkulumane 12.
Ohlala kulindlu, uPrecious Ndlovu utshele intatheli ukuthi wezwa umsindo okhencezayo, ongaqondakaliyo phandle kwefasitela lekamelo lakhe wasecabanga ukuthi mhlawumbe yinja yakhe.
“Ekuqaleni ngacabanga ukuthi yinja yami etshaya okuthile,” kutsho uNdlovu, ebonakala eqhaqhazela. “Kodwa ngithe ngilunguza ngefasitela, ngiphose ngaqaleka. Ngibone isalukazi, sinqunu ngokupheleleyo, silele egcekeni lami sengathi siwe sivela ezulwini.”UNdlovu uthe uhlabe umkhosi, wavusa omakhelwane.
“Ngangi ngeke ngiphume ngedwa ebusuku. Ngangi sesaba. Ngalinda omakhelwane bami ukuthi beze. Kwatheleka omakhelwane ababili abalesibindi.
“Ngehlukela ukulala. Yonke imisindo engiyizwayo ingenza ngicabange ukuthi ngomunye umthakathi osefikile.”
Ekhuluma ngesimo sesalukazi, omunye umakhelwane uthe: “Waye phethe evula umlomo kodwa kungaphumi amazwi. Wacina esebhala ibizo lekheli ephepheni.”
Kubikwa i-durawall yomuzi yakwatuka, okwaveza ukuthi uNgwenya wawa, wangena egumeni ngolaka.
“Abathakathi bakhona sibili, lobu yibufakazi,” kutsho omunye umakhekwane.”
UNgwenya wathathwa ngamapholisa, amsusa ebantwini njengendlela yokumvikela.
Kusenjalo, kulesakhamizi esitshayele intatheli ucingo, sibika ukuba uNgwenya akathakathi kodwa uhlutshwa ngumkhuhlane wokukhohlwa, owe-dementia.
“Ubonakale ngoLwesibili emarobhothini eTshabalala njalo ubecabanga ukuzibulala.
“Umama wamhambisa emapholiseni eTshabalala. Engabe waphuma enkambeni yamapholisa, wakhupha izigqoko,” kutsho isakhamizi lesi, esale ukuveza ibizo laso.
