admin
NGITHANDA ukubonga isiphathamandla samapholisa eGwanda ubaba uMandlenkosi Moyo kanye lequla lakhe, ngibonga kakhulu ngimele izakhamizi zikaWadi 24.
U-Officer Commanding Gwanda District Chief Superitendent Mandlenkosi Moyo sisebenze laye lequla lakhe kwabotshwa imigulukudu yamasela enkomo amanengi.
Ungafika kuWadi 24 nxa bebona umuntu eganga uzwa bethi siyakubizela uMoyo lequla lakhe, lokhu kukhomba ukuthi kwasetshenzwa ngendlela enhle, inengi lezakhamizi lathola izifuyo zabo kusukela eBeitbridge kuze kuyefika eKezi.
Kwaphunywa ijumo nguMoyo lequla lakhe bencediswa yimbiko ababeyinikwa yizakhamizi, ngoba phela izakhamizi zazi amasela ngcono.
Babuya labamabhiza, abezinja, labahlome ngenkafulakufa ngitsho sibi sabacuphi abazigqokela njengomuntu makhaza.
Abanjwa amasela kwathi amanye abaleka ngoba labo sebengcwetshwe indlebe ngabanye abasebenzisana labo ukuthi kabathi nyawo ngibeletha, kuza elikazamcolo, elithwele othekwane.
Amanye amasela aphunyukayo azwakalela kuboGoli kodwa okusalayo bayobanjwa kuphela kambe ungahlala ugijima kokuphela ingani layo inyoni ehamba ngokuphapha iyahlala phansi ikhokhe umoya.
Phela ubusela besebusezingeni eliphezulu kakhulu njalo besekulezigaba besekulalaba ababathi ngotetisi laba bekungabahamba bayotshontsha baqhube ziyevalelwa emasimini bona ukuthi ziyangaphi zithengiselwa bani akusimlandu wabo njalo okwabo bathembe ijubane nxa bephazanyiswa endleleni bagijima okomvudla ebona umlindi wesambane uSpot engemuva.
Kube sokusiba labanye abahlolayo, laba ke yibo ababona ukuthi sezifikile inkomo zigcinekile ziyathola amanzi, ingongonono yizo ezidinga izimota zokuthwala ngitsho sibi sama-clearance zingavela zigade phinde uzibone.
Kuthe ngokuza kukaMoyo lequla lakhe sokunganeno ngoba izakhamizi sezikwazi ukulala obukaBhuka. Phela ubuthi ungezwa inja ikhonkotha ebusuku sekumele uvuke ukhangelisise ukuthi ngabe ibonani.
UMoyo lequla lakhe aluba nga kuyangathi abahlali bakaWadi 24 besilinxusa ukuthi lihlale lisivakatshela senze eminye imihaso ukuze siphungule ubusela lobu ngoba lezinye izisebenzi zikaHulumende kulo umhlubulu beseziphathisana lamasela, besekukompunzi idla emini lemisebenzi ibisidingwa kungongonono zamasela, uqhatshelwe ukuyaqhuba inkomo ezitshontshiweyo.
Siyabonga thina abahlali baseGwanda South sithi eMoyo uNkulunkulu akwenzele okuhle, aluba amapholisa angaphansi kwakho angalandela amasondo akho emisebenzi emihle sohlala ngokuthula elizweni, ye bangaba khona ababili abathathu abangama-bad apples kodwa bayophanga babanjwe baxotshwe umsebenzi.
Masela lukhulu luyeza, bhasopu.
Ayixabene.
Umlobi ungamthinta ku: 0714355641
Online Reporter