admin
Thokozile Mbedzi
AMAPHOLISA akoBulawayo ngoLwesibili kuyonale iviki avakatshele esikolo seMpopoma High leMsitheli High esiyaxwayisa abafundi ngokudala amacala kulandela ukuqhamuka kwezimpi phakathi kwabafundi bezikolo lezi kuviki ephelileyo okubangele ukuthi kubhidlike impahla.
Isikhulumi samapholisa koBulawayo uInspector Abednico Ncube utshele abafundi bezikolo lezi ukuthi baqaphele indlela abaziphatha ngayo ngoba belakho ukuphambanisa impilo zabo.
Kuzimpi lezi kubikwa abafundi bahlaselane ngamatshe, ingqamu, induku kanye lezinye izikhali ezibangele ukubhidlika kwempahla.
UInsp Ncube uthe njengamapholisa balokukhathazeka ngendlela abafundi asebeziphatha ngayo.
“Sikhathazekile ngendlela eseliziphatha ngayo. Isikolo seMpopoma silodumo oluhle kodwa nxa seliziphatha ngale indlela kwenza lingasagxili ezifundweni zenu okuyilapho okulekusasa lenu.
“Isenzo esenzakale ngeviki ephelileyo ngoLwesihlanu sizaphambanisa imbali yenu. Ubhubhane lweCovid-19 akumelanga lilusebenzise ukwenza ubudlwangudlwangu.
“Bafundi qaphelani nxa lisenza izenzo ezingaqondanga lizibulalela ikusasa lenu ngoba konke okwenzayo kuyagcinwa lapho kuvela amathuba ama-scholarship lokho owakwenzayo kuyabe sekukuvalela amathuba lawo,” kuxwayisa uInsp Ncube.
“Bafundi nxa lingahlangana lokuhlukuluzwa loba ngumuntu elimaziyo bikelani ababalisi lingathuli okubi kusenzakala. Abanye basuka lokuziphatha okubi emakhaya ngakho kumele lingakulethi esikolo ngoba kuphambanisa abanye. Bafundi banini lobuntu lingabhidlizi impahla yesikolo,” nguInsp Ncube lowo.
“Tshiyanani lomkhuba wokuthatha izidakamizwa ngoba abanye benu bacina bedala amacala befuqwa yilezozidakamizwa. Umthetho ke wona uyachwayisisa amacala adaliweyo abantu bajeziswe.”
Umphathisikolo weMpopoma uMnumzana Christopher Dube uthe abazali balendima enkulu okumele bayidlale.
“Sicela abazali basiphathise kakhulu ngoba ekukhulisweni kwabantwana kulendima enkulu okumele bayidlale njengabazali thina siyazama ngawo wonke amandla ukubancedisa ngezifundo kodwa nxa sebephume phandle kwesikolo abantwana baba lokuziphatha okungaqondanga.
“Kungakho abazali kumele bazi ukuthi balomlandu omkhulu wokuba babekwazi ukuba abantwana bangaphi njalo benzani labobani ukuze ikusasa labo lingaphambaniseki,” kutsho uMnu Dube.
Umphathisikolo weMsitheli uMnumzana uCanny Vundla uthe ukudilizwa komduli lokubulawa kwamafasitela esikolo sabo akumelanga kwenzakale futhi.
“Kubhidlizwe impahla lapha esikolo ngabantu asebatshiya isikolo. Vele uhlupho luba phandle ikakhulu abafundi nxa sebephumile kabafuni ukuya ngakibo ngesikhathi ngakho abazali kabadlale labo indima yabo ngoba thina esikolo siyenza umsebenzi wethu,” kulandisa uMnu Vundla.
Online Reporter