adminNDAUWE ndauwe kumakanyi kweduyo, kungaa kwaChibuwe, Pfidza, Chirinda, Tonhorai nekwaChecheche. Tiri kuti dai zviro zvedu zvaramba zvakati chechete kudai.
Ngatidhibanehe nyamashi ngemusi weChina teigonde kuti mweya nenyama zvichakagarisana kahle akhiti woye.
Nyamashi uno tinode kureketa ngedoro remakoto. Doro retiri kureketa ndiro nyamashi uno, idoro rinobikwa apo taakunasirire kunaya kwemvura. Doro remakoto rinobikwa gore ngegore kana mvura yoode kuzouya zviyana.
Mwedzi uno tinaChikunguru. Ndiyo nguwa inonga yaakude kuzokunguruke mvura yetinorima ndiyo mabonore, manzungu, nyimo, mhunga, mafunde nemungoza. Mvura ikatamika zviyana, pfuma inofukama ngenzara ikapere kutsakatika.
Pfuma ndiyo nhakazve yeMandau. Tinodziona mwombe dzakai pepetee kufa zviyana kana mvura yakorere kunaya gorero. Saka madoro ano akakosha yaemho pachianhu chedu netsika dzedu dzechiNdau.
Saka tiri kuti madoro aya ngaabikwe zviro zvedu zvihambe kahle nemurandu. Doro remakoto rinokone kubikwa musha ngemusha. Raibva zviya, rinozoomwirwe iyo kuchikwasha ngemunhu weeshe wemunharaunda.
Aritsari munhu unorimwa akadi, mukadzi anhu aamuna, asi atizodiwo ndumurezve pamadoro akadai. Rinokonahe kumwirwe pamuti mukuru wechikare munhaaundamwo.
Ndingade kubhuya ngekweduyo kwerinomwirwe pasi pemutsamvu wekwende kugwenga rekwaMakayawe. Kana anhu asikadi kubika musha ngemusha, anoite musengamusenga pamumera nezviro zveeshe zvinodiwa kubike dororo, zvounganidzwe pamuzi umwe perinobikirwa.
Tshembere dzokumana dzobika hadzo doro riya. Mvura inobike doro iri inocherwa ngeasikana asati aakuende kunguwa. Saka thunototsvakwa tusikanetwo, mutungwe punhu koochere mvura kumukowa.
Pane angade kureketa naPenyai ngatidhibane pa 0772332264, 0712948959
Online Reporter