Online Reporter
Nkosilathi Sibanda loFungai Muderere
ILIGI yeCastle Lager Premier Soccer League ingena kuhlandla lesi-29 kulimpelaviki, lapho amaqembu amathathu akoBulawayo, iChicken Inn, iBulawayo Chiefs leHighlanders, ebhekane lomthwalo omkhulu, kodwa ehlose ukuqoqa imiklomelo eqakathekileyo njengoba isizini isisondela esigabeni sayo sokucina.
IChicken Inn yiyo ezakhokhela amaqembu akoBulawayo nxa isiya eWadzanai Stadium ngoMgqibelo lapho ezadlala khona leSimba Bhora. Umdlalo lo udonsa amehlo ngenxa yabaqeqetshi ababili abake basebenza emaqenjini aphikisanayo.
ISimba Bhora iqeqetshwa nguMandla “Lulu” Mpofu, owake waba ngumqeqetshi weChicken Inn, ikanti iGamecocks iphethwe nguTonderai Ndiraya, owake wakhokhela iSimba Bhora ukuthi ithumbe isicoco seligi yePremier Soccer League ngo-2024.
Ukwazana kwabaqeqetshi laba lamaqembu abo, kuzakwengeza ubumnandi kulumdlalo.
UMpofu uzathemba ukuthi abadlali bakhe bazakwenza ngcono njalo benze umdlalo opheleleyo bebhekane leqembu akade eliqeqetsha, ngemva kokuba iSimba Bhora ibingaqhubi ngendlela ayifunayo.
IChicken Inn yona izafuna ukusebenzisa ulwazi uNdiraya alalo ngeSimba Bhora ukuze ibuye eShamva ilemiklomelo yonke. NgeSonto iBulawayo Chiefs izamukela iTriangle United enkundleni yeLuveve. ITriangle ingena kulumdlalo ilwisa ukungaweli kuDivision One, njalo yonke imiklomelo izabaluleka.
Amakhosi Amahle kuzamele aqaphele ukuthi kawathathi lula amaqembu asengozini yokwehla.
EMagumeni iHighlanders izamukela iHardrock FC komunye wemidlalo ekhangayo. IBosso ingena kulumdlalo ilomfutho omkhulu ngemva kokukhupha iMWOS kuChibuku Super Cup, impumela enike iqembu leli elikhulu lakoBulawayo ithemba elitsha phambi kokubuyela emidlalweni yeligi.
Kodwa iHardrock kayisilo qembu elilula.
Iqembu leli elisanda kungena kuligi ephezulu lilwela isicoco seligi ngesizini yalo yakuqala kuPremier Soccer League njalo selimangalise abanengi ngendlela eliqhuba ngayo.IHighlanders kuzamele idlale ngelikhulu icebo ibhekane leqembu elilamaphupho okuthatha isicoco.
Ukulambela imiklomelo kuHardrock kungaletha umdlalo oqinileyo eBarbourfields, ngesikhathi iBosso izabe ifuna ukuqhubekisela phambili umdlandla ewuthole kuChibuku Super Cup.
