Online Reporter
Abel Ndooka
KUNENGE kusingadanwe anonzwa musi weMugovera paGrange Christian School, muHarare apo shasha dzekumhanya dzichakwikwidza mumujaho weArchbishop Ezekiel Guti half-marathon pamwechete newalkathon.
Makwishu aya anoitwa gore negore senzira yekurangarira mushakabvu gamba renyila Archbishop Ezekiel Handinawangu Guti, avo vakamba chechi yeZimbabwe Assemblies of God Africa Forward in Faith International Ministries (ZAOGA FIF).
Archbishop Guti vakazvarwa musi wa5 Chivabvu mugore ra1923 uye mujaho uyu unoitwa apo zuva ravakazvarwa rinenge raswedera senzira yekuvarangarira.
Gore rino, kekutanga shangwiti dzekumhanya dzichakwikwidza mumujaho we21km half-marathon.
Nerimwe divi, vamwe vachaita walkathon vachifamba dzendo dzakareba makiromita anoti 2,5km, 5km ne10km.
Munyori mukuru weZAOGA FIF – Apostle Mishael Nyambo – vanoti senzira yekurangarira Archbishop Guti, mutambo wewalkathon uyu unoitwa gore negore zuva ravakaberekwa rave kusvika naizvozvo gore rino vachaita mutambo uyu musi 2 Chivabvu.
“Baba vedu Archbishop Guti munhu aikoshesa utano uye vaimuka mangwanani ega-ega vachifamba dzendo dzakasiyana. Saka isu tinoita walkathon iyi gore negore senzira yekuvarangarira nemabasa makuru avaiita muhupenyu hwevanhu.
“Gore rino, tadzoka zvakare newalkathon iyo tichaita musi weMugovera pazuva iro ratinoti Archbishop Ezekiel Guti Day. Zuva iri tinorangarira mabasa makuru avaiita mukushumira vhangeri raJesu,” vanodaro.
Vanoti gore rino pachamhanywa half- marathon sezvo vange vanzwa nekukumbirwa nevakawanda kuti varonge mujaho uyu.
“Makore adarika, tange tichingoronga walkathon chete asi gore rino, vanhu vakawanda vange vachiuya vachiti vanoda kumhanya half- marathon pazuva iri. Saka takazviona zvakakodzera kuti tironge mujaho wehalf- marathon vanhu vakawanda vauye tigofara pamwechete tichirangarira gamba redu.
“Archbishop Guti munhu aida vechidiki zvakanyanya pamwechete nevakuru, saka mujaho uyu uripo pakusimudzira vechidiki kunyanya uye nevanhu vakuru.
“Vaiti vechidiki vanofanirwa kutsvagirwa zvekuita nekuti vakasiwa vega vanopedzisira vamedzwa nezvinodhaka. Mujaho uyu tinovimba kuti uchabatsira vakawanda kusimudza zvipo zviri mavari,” vanodaro Apostle Nyambo.
