Online Reporter
Ethel Ncube
IQEMBU lakoBulawayo lomgido wesiNtu leEzimnyama Dance Ensemble selifake unxuso kulabo abafisa ukuba yingxenye yabo kwezokugida.
Umqondisi weqembu leli, uPhibion Ncube wethule umbiko wokuba badinga abantu abangaphatheka ekugideni kuqembu lakhe.
Uthe njengeqembu bafisa ukuba lamalunga amatsha azakuba yingxenye yeqembu ngenhloso yokukhulisa iqembu leEzimnyama Dance Ensemble.
“Sidinga abantu abangaba yingxenye yethu abazaphatheka ekugideni, sifuna abantu abaleminyaka engu-18 kusiya ku-30. Sizabe sise-Stanley Hall, eMakokoba. Esikufunayo yikuthi umuntu enelise ukugida umgido wesiNtu lomunye owodwa ukuze enelise ukuba yingxenye yethu.
“Lonyaka kumele sikhangelele ukuyavakatshela emazweni aphetsheya kumicimbi etshiyeneyo ukuze siyebukisa ithalenta lakithi kanye lobuhle bemigido yethu yesiNtu,” kubika uNcube.
Uqhubekele phambili eveza ukuba banxusa bonke abafuna ukuphatheka eqenjini labo ukuthi babuye bezokuba yingxenye.
“Sinxusa bonke abatsha abalethalenta lokugida ukuthi bangesabeli khatshana babuye bazokuba yingxenye yeqembu lethu.
“Ukuphatheka kumaqembu omgido wesintu kuyancedisa kakhulu ekususeni abatsha emabholohweni kunye lokuthi bacine bethatha izidakamizwa, kungakho le yindlela yethu lathi yokususa abatsha bethu kuzidakamizwa,” nguNcube lowo.
