Online Reporter
Ethel Ncube
ABALANDELI bezomculo lemigido yamasiko eSouth Africa bababaze ubungcitshi lobuciko beqembu lakuleli eleZimnyama Dance Group, ngesikhathi likumkhosi weTiro Mpane Foundation National Choral Eisteddfod, ePitoli.
UPhibion Ncube, umqondisi weqembu, ubike ukuba uhambo lwabo lwaluluhle kakhulu njalo bathole usekelo olumangalisayo.
“BesiseMzansi lapho akade sitshengisa khona amasiko akuleli. Siyathokoza ngendlela esamukelwa langokusekelwa ngababukeli, bencoma umsebenzi wethu. Saxhumana labantu abavela endaweni ezitshiyeneyo, sakha ubudlelwano,” kubika Ncube.
Uqhubekele phambili eveza ukuba bona njengeqembu bazimisele ukubhoda bebukisa umsebenzi wabo.
“Sizimisele ukuba sibhode amazwe wonke ase-Afrika sibukisa amasiko ethu njalo lalokho esidume ngakho.
Sitshengisa lokubambana lobuntu, njengabantu be-Afrika. Ukubhoda lokhu kuyakwenza abantu basazi njalo babekwazi lamasiko lesiNtu saseZimbabwe.
“Sizimisele ukusebenza gadalala. Kukhona esisakupheka, kuthi kungavuthwa-ke siqale lapha ekhaya sikwethulele uzulu. Ngomnyaka ozayo siyakwethula emazweni aphetsheya umsebenzi esiyabe siwuphekile.”
