Online Reporter
Ethel Ncube
INKAMPANI ye-Fivet yethule uhlelo lokufundisa abalimi mahala ngokufuya inkukhu, imbuzi, izimvu kunye lokugcinwa kwengulube.
Uhlelo lokwabela abalimi izifundo ngokufuywa kwezifuyo ezehlukeneyo luqalise ngoLwesithathu, eMethodist Church esenzikini yedolobheni lakoBulawayo.
Kubikwa ngoLwesithathu abalimi bebefunda ngokufuywa kwengulube kukanti ngoLwesine (lamuhla) bafunda ngokufuya inkukhu eRoman Catholic Cathedral kuthi ngoLwesihlanu endaweni efanayo bazafunda ngokufuya imbuzi kunye lezimvu.
Ekhasini labo le-Facebook abe-Fivet baveze ukuba inhlelo lezi zonke zizaqhutshwa mahala kungelambadalo.
“Ukufunda ngokufuya inkukhu kuzaqhutsha ngoLwesine mhlaka 16 Mfumfu eCathedral lapho okuzafundwa khona ngokwakha izilugu zenkukhu, ukugcina inkukhu zenyama, ukunakekela inkukhu zamaqanda kunye lendlela ongenza ngayo imali. Okunye okuzafundwa yindlela okumele unike ngayo ukudla inkukhu zakho ukuthi zidla okunganani kunye lokufunda ngemikhuhlane engahlasela inkukhu lemithi okumele ithengwe lezinye izifundo ezitshiyeneyo eziphathelane lokugcina inkukhu,” kutsho abe-Fivet
Kukanti ke izifundo zokugcina inkomo, imbuzi lezimvu lazo zizaqhutshwa ngoLwesihlanu.
“Izifundo zokugcina izifuyo zizakwenziwa eCatholic Cathedral, lazo ziqalisa ngo 9 ekuseni ziphele ngo2 emini.
“Kuzafundwa ngokudibhisa izifuyo, ukuvikela izifuyo emaseleni angabonakaliyo afana lamawemusi kunye lendlela ongenza ngayo imali ngomhlambi olawo lezinye izifundo ezinengi,” kutsho isitatimende seFivet.
