Online Reporter
Ethel Ncube
UHLANGOTHI olubona ngeze-Agricultural Engineering, Mechanisation and Farm Infrastructure Development ikhuthaza abalimi ukuba bafulele ingalane lapho abafake khona izilimo zabo ukuze bavikele ukubola kwazo.
Ingalane nxa ingafulelwanga isivuno somlimi silakho ukwehla kakhulu ngoba izilimo ezilapho ezisanda kukhutshwa emasimini zilakho ukuboliswa lizulu.
UManjinela uOliver Mashiri onguProvincial Mechanisation Engineer esabelweni seMatabeleland North uthe kuqakathekile ukufulela ingalane.
“Abalimi kumele bafulele ingalane zabo ukwenzela ukuthi izilimo zabo zingaboli zona zivunwe emasimini zisesimeni esihle. Khathesi izulu liyana loba nini izilimo ziyanethwa zicine sezibola, isivuno sehle,” kutsho uManjinela uMashiri.
Uqhubekele phambili exwayisa abalimi ngendlela yokwakha ingalane zabo.
“Sikhuthaza abalimi ukuthi bakhe ingalane zabo ngezigodo langocingo bangaqeda lapho bafake i-red guard ukuthi amagundwane angaqansi adle izilimo ezifakwe lapho.
“Ingalane yakho kumele ikhangele lapho okuvela khona umoya ukuze umoya lowo womise isivuno sakho. Ububanzi ingalane akumelanga idlule i-1,5 metres kuthi ubude buya ngesivuno ukuthi singanani. Ingalane leyo kumele ifulelwe ngamazenge kumbe utshani ukuze kunganetheli nxa izulu lisina,” kutsho uManjinela uMashiri.
Uqhubekele phambili eveza ukuba abalimi kabazame ngendlela zonke ukuvikela izilimo zabo.
“Abalimi sibakhuthaza ukuba balandele izixwayiso zethu bafulele ingalane. Kubuhlungu ukuthi umlimi athi esevunile alahlekelwe yisivuno sakhe.
“Ukufulela yindlela yokuba senqabele ukwehla kwesivuno sethu nxa sesivunile,” kubika uManjinela Mashiri.
