Online Reporter
Mthabisi Tshuma
UKHUNJULWE ngokuhaywa kwenkondlo okuncomekayo, okuthinte inhliziyo umuyi uDesire “Moyoxide” Moyo, ngesikhathi kusethulwa amadlalade amabili enkondlo koBulawayo.
UMoyo, owayedume ngokuba yimbongi, ngoMgqibelo odluleyo uthole ukuhlonitshwa nguThaluso Da Poet labaculi abasakhulayo uMethembe Moyo loNomalanga Choice Moyo, abadume ngokuthi yi “Oxide Kids”.
UMethembe loNomalanga ngabantwana bakaMoyo. UMethembe, unguForm 6 eSelonga High School eGwanda. uNomalanga ufunda uForm 4 eZezani High School eBeitbridge.
UThaluso ubesethula idlalade lakhe lesithathu elithi “Thula Sizwe”, esebenzisana loMswane weMbabala. Kuphinde kwabalusuku lokwethulwa kwedlalade likamuyi elithi “IDabane”.
UThaluso le-Oxide Kids bathathe umcimbi lo bawubeka kwelinye izinga ngokwethula inkondlo ezigcwele imizwa, ukukhathazeka lokuhlekisa.
UThaluso uthe uzizwa ekhululekile ngemva kokuphumelela ukulondoloza ilifa likaMoyoxide.
“Bekungumcimbi ogcwele imizwa, kodwa ngesikhathi esifanayo ngizizwa sengikhululekile ngoba bengizizwa angathi ngithwele umthwalo osindayo. Sengingatsho ngokuzethemba ukuthi uMoyoxide angaphumula,” kutsho uThaluso.
Uncome i-Oxide Kids, esithi balamathalenta amakhulu lekusasa elihle. “I-Oxide ibilolonga isesikolo. Bahlakaniphile njalo baligugu.”
UThaluso uthe ukugcwala kwabantu emcimbini kumfundise ukuthi inkondlo zakhe kumele ziqhubeke zikhuluma ngendaba ezithinta umphakathi.
