Online Reporter
Ethel Ncube
INHLANAGANISO ebona ngezifuyo isikhuthaze abafuyi ukuba babone ukuba izibaya zabo zembuzi zifulelwe ngesikhathi sezulu ukuze izifuyo zabo zingahlaselwa yimikhuhlane etshiyeneyo.
UDokotela wezifuyo uWalter Dube, uveze ukuthi ngesikhathi sezulu imbuzi ezinengi ziyafa ngembangela yokuthi ziyabe sezihlaselwe yimikhuhlane ebangelwa yibumanzi.
Ekhuluma lentatheli, uDokotela Dube ubike ukuba abalimi kumele bafulele izibaya zabo.
“Isikhathi sezulu yisikhathi esinzima kakhulu kubalimi ikakhulu abafuya imbuzi ngoba zifuna ukuba zihlale esibayeni esivalekileyo njalo isinganetheliyo.
“Imbuzi zingaba sesibayeni lapho okunethela khona, kube manzi phakathi, imbuzi zilakho ukuhlaselwa ngumkhuhlane wamasondo. Ukuze senqabele ukulahlekelwa yizifuyo zethu asifuleleni izibaya zethu,” kutsho uDkt Dube.
Uthe izibaya zembuzi zingafulelwa ngamazenge loba utshani ukuze zinganethwa.
Uqhubekele phambili echasisa ngobuhle bokuhlalisa imbuzi endaweni evalekileyo.
“Isibaya sakho nxa kuvuma kumele usakhe kube yisibaya esiphezulu ukuze lanxa izulu lisina kungabi lodaka. Ukusifulela akumelanga wekele, kumele usifulele ukuze izifuyo zakho zinganethwa.
“Nxa ulamazinyane lawo kumele ubone ukuba lapho ahlala khona akunetheli ngoba sengafa aphele du eqedwa lizulu. Lawo kumele agcinwe endaweni ekhudumalayo. Ukufulela isibaya sakho kuqakathekile ngoba kwenqabela ukuba izifuyo zakho zihlaselwe yimikhuhlane yokubola amasondo,” kuphetha uDkt Dube.
