admin
MURAIRIDZI waTyson Fury anoti ane chivimbo chekuti mutambi uyu – uyo aimbove shasha ine bhande reheavyweight – achadzoka mutsiva zvine mutsindo.
Fury akatorerwa rezinesi rake retsiva muna Gumiguru apo aiongororwa mhosva yekutora zvinodhaka muviri zvisingatenderwe ndokusiya mabhande eWBA, WBO neIBF achiti ave kumborapwa sezvo ange ane chirwere chekunetseka mupfungwa.
Murairidzi waFury anove sekuru vake, Peter Fury, akati Tyson ari kunzwa zvakanaka hake asi kudzoka kwake mutsiva ichave sarudzo yake mbune.
“Tyson ari kuita zvakanaka. Iye zvino ari kumbowana nguva yekuzorora muhupenyu hwake pasina anomuongorora,” akadaro Peter.
“Ndakamboita nguva ndinaye manje-manje uye hatina kumbotaura nezvekudzoka kwake mutsiva. Tainge takazorora tichifara zvedu nemhuri dzedu.
“Zvinhu zvekuti Tyson anofanirwa kuzvisarudzira iye ega kuti anoda kudzoka kana achiri kuda zvetsiva.
“Asi ndinoziva kuti achadzoka – handifunge kuti ane zvimwe zvinhu zvaanoziva futi.
“Achingori nemakore 28 uye ndinoziva kuti ane zvakawanda zvekupa mumutambo uyu.”
Tyson akakatyamadza pasi rese apo akakunda Wladimir Klitschko ndokutorera chizvarwa chekuUkraine ichi mabhande eWBA, WBO neIBF kuDusseldorf muna Nyamavhuvhu 2015.
“Tyson akaita zvakatadzwa nevamwe vanhu vese,” akadaro Peter.
“Akaenda kuGermany ndokukunda shasha yepasi rese, uyo ainge asati ambokundwa mumakore 11.
“Aitarisirwa pasi mumutambo uyu achipindamo. Yakave nyaya yakafadza zvikuru uye handifunge kuti zvichadzokorodzwa zvakare. Zvinhu zvakafadza zvekuti tese takamufarira.
“Ndinofunga kuti achasimudzira zvakare mumutambo uyu, asi kuti rinhi handingazive zvinotoda iye ndiye anoziva.” – Sky Sports News.
Online Reporter