Online Reporter
Kingstone Mapupu
MURUME aishanda semuchengetedzi weimwe kambani kuMasvingo, Tenant Chiremba (26), akapihwa chirango chekugara mujeri kwemakore manomwe nekuda kwemhosva yekuba mari inosvika US$975 muhofisi yekambani iyi uye ndokuzoipisa senzira yekuparadza umbowo.
Chiremba akapinda mudare reMasvingo Magistrates Court nemusi wa11 achitarisana nemhosva yekutyora chikamu cheSection 140 chemutemo weCriminal Law Codification and Reform Act Chapter 9.23.
Akasungwa nematikitivha eCriminal Investigations Department (CID) kuMasvingo mushure mekunge aba mari muhofisi yekambani yaaishandira ndokuzopisa hofisi yacho senzira yekuparadza umbowo.
Mutauriri wechikamu cheCID munyika, Detective Inspector Rachel Muteweri, vanoti Chiremba aishandira Muzpen Security Company apo akaba US$975 mumahofisi ekambani iyi.
Akabva azobatidza nemoto muhofisi maaiva aba mari iyi senzira yekuparadza umbowo.
“Murume uyu paakapisa hofisi iyi, aiva nechinangwa chekuparadza umbowo hwemhosva yekuba iyo akanga apara. Moto waakabatidza uyu wakaparadza midziyo inokosha US$16 010. Nekuda kwenyaya iyi, akazopinda mudare reMasvingo Magistrates’ Court pamberi pemutongi Caroline Tafirei uye muchuchisi ari Laiton Katsidzire,” vanodaro Det Insp Muteweri.
Vanoti dare iri rakatura mutongo wekuti Chiremba agare mujeri kwemakore manomwe.
“Semapurisa, tinorumbidza zvikuru matare nekuzvipira kwevatongi nevachuchisi mubasa ravo munyaya yekurwisana nekuparwa kwemhosva nekuona kuti mitemo yatevedzwa,” vanodaro Det Insp Muteweri.
