Online Reporter
Kingstone Mapupu
MURUME ane makore 32 okuberekwa wekwaSabhuku Makurumidze kudunhu raMambo Gutu, kuMasvingo akasungwa nemhosva yekubata chibharo hanzvadzi yake nekuzoiponda.
Mutauriri wemapurisa kuMasvingo, Inspector Kudakwashe Dhewa, vanoti nemusi wa1 Kurume gore rino, Tongai Chirume akabata chibharo hanzvadzi yake ine makore 33 okuberekwa ndokuzoiponda.
“Tongai Chirume paakabata chibharo hanzvadzi yake, zvaiva mumaziso emwanasikana wemudzimai uyu ane makore mana okuberekwa. Apedza kubata hanzvadzi yake chibharo, akabva amuponda nekumurova achibva anokanda mutumbi wake mumugodhi waisashandiswa uyo wakadzika mamita 1,5 ndokuzotiza achienda kusina anoziva,” vanodaro Insp Dhewa.
Vanoti nyaya iyi yakazomhan’arwa kumapurisa.
“Nemusi wa18 Kurume, mapurisa eZRP Masvingo vakazowana runyerekupe rwekuti murume uyu aiva akahwanda kuVillage A1 kupurazi reDronemore kudunhu raMambo Musara kuMasvingo. Mapurisa vakamhanyirako ndokunomusunga musi wakare uyu,” vanodaro Insp Dhewa.
Vanoti semapurisa, vanorumbidza zvikuru veruzhinji nekuvawanisa mashoko akaita kuti Chirume asungwe.
“Tinonyanya kutenda veruzhinji nekuwanisa mapurisa mashoko akaita kuti Tongai Chirume asungwe nemhosva yaari kupomerwa iyi yekubata chibharo nekuponda. Nyaya iyi iri kufambira mberi nekufeewa achitarisirwa kupinda mudare redzimhosva munguva pfupi iri kutevera,” vanodaro Insp Dhewa.
Vanoenderera mberi vachiti: “Sedunhu reMasvingo, tiri kushushikana zvikuru nemhosva dzekubatwa kwemadzimai nevanasikana chibharo uyewo nekupondana.”
