Online Reporter
Munyori weKwayedza
GADZIRIRO dzemhemberero dzekusvitsa makore 46 vanhu vatema vachizvitonga zvizere muZimbabwe, idzo dzichaitwa kuMaphisa, kuMatabeleland South, nomusi weMugovera dzave padanho repamusoro.
Vachitaura kuvatori venhau mushure mekupera kwemusangano weCabinet muHarare nomusi weChipiri svondo rino, Gurukota rezvekuburitswa kwemashoko nenyaya dzenhepfenyuro — Dr Zhemu Soda — vanoti dare iri rakatambira gwaro rakaturwa neGurukota rezvekutongwa kwematunhu nemabasa evoruzhinji, Daniel Garwe, pamusoro pegadziriro dzemhemberero idzi.
Mutungamiri wenyika, President Mnangagwa, ndivo vachatungamirira mhemberero idzi, idzo dziri kuitwa pasi pedingindira rinoti: “Zim@46 — Kubatana neBudiriro zvakanangana nemuono weVision 2030”.
Dr Soda vanoti gadziriro dzekuitwa kwemhemberero idzi dzave padanho repamusoro.
“Gadziriro dze2026 Independence Day Celebrations, Children’s Party nekufambiswa kwemabasa ezvivakwa zvakasanangurika zvave padanho repamusoro, apo zvakawanda zvacho zvinotarisirwa kupedziswa mhemberero idzi dzisati dzaitwa.
“Zvivakwa zvakakosha zvakadai sepachaitirwa mhemberero, nhandare nemigwagwa zvinotarisirwa kupedzwa kugadzirwa nomusi wa15 Kubvumbi. Kugadzirwa kwemigwagwa mikuru inosanganisira Bulawayo-Maphisa neGwanda-Maphisa kuri kuenderera mberi uye kunotarisirwa kupera muna Nyamavhuvhu 2026,” vanodaro.
Dr Soda vanoti mabiko eChildren’s Party, ayo achaitwa nomusi wa17 Kubvumbi, achapindwa nezviuru zvevana.
Mabiko aya achaitirwa paMahetshe Primary School uye anotarisirwa kupindwa nevana vanosvika 3 050.
