Online Reporter
Ethel Ncube
INHLANGANISO yeHlango Ranch egxile ekufuyeni inkomo zohlobo lwamaBrahman amhlophe isiveze ukuba kuqakathekile ukugcina amarekhodi enkomo.
Umnikazi wenkampani yeHlango Ranch uMnumzana Jairos Mahlangu uveze ukuba amarekhodi enkomo ayancedisa umlimi ukuthi abe lolwazi olubanzi ngenkomo zakhe.
Ekhuluma lentatheli uMnu Mahlangu ubike ukuba kubalulekile ukugcina amarekhodi ezifuyo zakho.
“Nxa ufuya inkomo zingabe zizinlutshwane kumbe zizinengi kumele ubhale phansi ukuthi inkomo leyo izelwe nini njalo lokuthi ileminyaka emingaki.
“Amarekhodi la ayanceda nxa suthe wacabanga ukuba uthengise inkomo yakho. Lo othengayo kungenzeka ukuba abe lemibuzo kumbe njalo acele ukubona lapho okubhalwe khona ngenkomo ayithengayo,” kulandisa uMnu Mahlangu.
Uqhubekele phambili esithi imbali ngesifuyo osithengayo ibalulekile ngoba iyancedisa lalo othengayo kubhizimusi lakhe lokufuya lokuqhelisa isibaya sakhe.
“Nxa umuntu ethenga inkomo eHlango Ranch siyamupha imbali yenkomo ayithengayo ukuthi yehlisa amalitha amangaki ochago ngosuku lokunye okutshiyeneyo.
“Othengayo uyatshengiswa futhi lapho okubhalwe khona ngenkomo ayithengayo ukuba abazali abazala inkomo le yibaphi ababone njalo abekwazi ukuthi inkomo ayithengayo ileminyaka emingaki.
“Nxa ungazange ubhale phansi uba lohlupho ukuba uchasise ngembali yenkomo yakho,” kubika uMnu Mahlangu.
Ubuye waveza ukuba abalimi abaqakathekise ukuba babhale phansi ulwazi lonke olufunakalayo ngezifuyo.
“Sikhuthaza abalimi ukuthi bazame ukuba babhale konke okuqakathekileyo ngenkomo zabo ukuze babezazi ngcono.
“Akumelanga ufanisele ngezifuyo zakho kodwa ubelolwazi olugcweleyo olubhalwe phansi ukuze kusincedise kusasa,” kuphetha uMnu Mahlangu.
