admin
Cornelius Luphahla
“ISIHLAHLA somkhaya silomsebenzi omkhulu kakhulu ebantwini kanye lezifuyweni.”
La bekungamazwi kaNkosikazi Memory Xaverio oyingcitshi kwezezihlahla kunhlanganiso yeForestry Commission, kumkhosi obuseNtabazinduna kuviki ephelileyo.
UNkkz Xaverio ubikele intatheli ukuthi isihlahla somkhaya singumquba njalo siyikudla ezifuyweni kanye lebantwini.
“Umkhaya ikakhulu isinga siletha umquba omuhle kakhulu ezilimweni ngamahlamvu kanye labantwana baso.
Amahlamvu lezithelo zawo kuyabuthwa kufakwe ezilimweni njengomquba.
“Ezifuyweni isihlahla lesi singumthunzi omuhle kakhulu njalo izithelo zaso ziyikudla okuhle nxa sezomile ikakhulu enkomeni kanye lembuzini,” kuchaza uNkkz Xaverio.
UMthunywa ubuye njalo wakhulumisana loMlawuli wenhlanganiso yeForestry Commission uMnumzana Darlington Duwa wachaza njalo ukuthi isihlahla somkhaya siqakathekile njalo ebantwini.
“Isihlahla somkhaya silenhlaka eziyikudla ebantwini njalo ezingasetshenziswa ukwenza iziwiji, amabhisikiti kanye le-dayi (dye). Inhlaka le ingumuthi ngoba yiyo efakwayo nxa kusenziwa imithi etshiyeneyo efana lowokukhwehlela.
“Kudala kwakungavamanga ukuthi abantu behlale begulagula ngesizatho sokuthi babehlala besidla inhlaka, ngakho iqakathekile kakhulu,” kutsho uMnu Duwa.
Uqhubeke njalo waveza ukuthi izihlahla lezi ziyasebenza njalo ukuvikela ukugugudeka komhlaba.
“Umkhaya ulomsebenzi omkhulu ngoba uyavikela ukugugudeka komhlaba njalo ulenkuni ezinhle kakhulu ngakho izakhamizi kufanele ziwulondoloze,” kutsho uMnu Duwa.
UMphathintambo obona ngezemvelo, amanzi kanye lomumo womkhathi uKhomuredi Oppah Muchinguri ubikele uzulu kulo umkhankaso ukuthi aphathe kuhle izihlahla.
“Ngithanda ukulikhuthaza ukuthi liphathe kuhle izihlahla ngoba kasikho isihlahla esingaqakathekenga. Khathesi izakhamizi zakule indawo ngizazigebhela isibholane ngoba zibe yisibonelo esihle ngokugcina izihlahla lezi ezisenze safika lapha.
“Ngakho ngilethemba lokuthi lonke lizakhuthalela ukugcina kuhle izihlahla,” kuphetha uKhmrd Muchinguri.
Online Reporter