admin
Indikimba – Ezenkolo
Imbongi nguArtwel T l Masuku
Isihloko senkondlo -Thethelela
Siqhubeka ngayo indikimba yenkondlo senkolo. Sezigiyile ezinye imbongi ngaphambili kuyonale indikimba zitshengisa ukuthi zona olwazo ukholo lugxile ngaphi.
Sizizwile zidumisa amadlozi akwazo. Akusicala lokho ngoba omunye lomunye ulokholo lwakhe. OkaMauku yena uthi: “Thethelela”.
Ucela iNkosi yakhe ukuthi ithethelele izono zayo kanye lalabo abayoneleyo ngoba kabakwazi abakwenzayo. Kusobala kumazwi ale imbongi ukuthi yona ikhonza indodana kaNkulunkulu, uJesu Kristu, lanxa ingamthanga bhadla ngebizo. Imbongi ithi bafakwe icala bengalazi. Bathukwe badelelwe kodwa abawalahlanga amazwi kaMdali wabo.
Singakulibali ukuthi uNkulunkulu ubizwa ngamagama athile kodwa yena emunye. Abanye bakhetha ukuthi nguNkulunkulu. Abanye bathi nguMdali abanye bethi nguJehova kodwa bekhuluma ngamuntu munye.
Imbongi ithi bahlezi emhlabeni belindele umbuso kaJesu Kristu. Iyagcizelela imbongi ithi makube njalo ibathethelele iNkosi yabo.
Siyasikuzwe bafundi abantu bezinkonzo ezitshiyeneyo bethi balindele ukuza kukaJesu Krestu kwesibili emhlabeni. Yiwo umbono olethwa yimbongi lapha ukuthi yona labanye abantu bahlezi lapha emhlabeni belindele ukuza kweNkosi yabo uJesu Kristu njalo icele ukuba abathethelele ezonweni kumbe kumalando abo.
Ikuveza obala ukuthi imemukele ngodumo uMdali wayo kumbe uMsindisi wayo kodwa ngaye kumbe ngalokho wafakwa icala. Ngaye uJesu Kristu ithi yathukwa njalo ngaye yadelelwa imbongi.
Lanxa kunjalo yazinikela kuMdali wayo ngoba ithi: “Ngakudumisa noma kunjalo.” Ithi lanxa ibubula ngobuhlungu ebuzwayo ithi izamdumisa uMdali wayo.
Iyaqhubeka imbongi ithi ikhala inyembezi: “Ngikhihl’isililo ngakudumisa.” Ithi lanxa kunjalo kayenziwe intando kaNkulunkulu wayo aze abathethelele.
Ngombono wembongi yena labanye bakhe bonile badinga intethelelo kuJehova. Ilandisa indlela zayo lapha emhlabeni imbongi lapho ithi: “Lapho ngihlezi ezweni/Ngimpofu ngokuzalwa/Umuzi lezwe ngingelakho olwami/Ngihlalel’ukuhlupheka bengenz’isigqili sabo/Izithukuthuku zami ziphelel’ eboyeni/ Ngohlala ngikudumisa/Ngith’ubathethelele ngoba abaz’abakwenzayo,”
Kulesi isicaphuna esilobe ngaphezulu kuvela kamhlophe ukuthi imbongi izinikele ukumdumisa uMdali wayo ngoba lanxa isiphakathi kobunzima lezinhlupheko ezinjani ithi izamdumisa uMdali wayo njalo icela ukuthi uMdali wayo abathethelele labo abamdlisa luklubhu ngoba abakwazi abakwenzayo.
Lendodana kaNkulunkulu yakhuluma amazwi afananayo lapho yayihlutshwa ngabantu basemhlabeni uJesu Kristu wacela uNkulunkulu ukuthi abathethelele ngoba babesenza konke okubi kuye ngoba bengazi abakwenzayo.
Qedisani isigaba sokucina sale inkondlo lani bafundi.
Online Reporter