admin
Thokozile Mbedzi
“Indoda ngeke iphile ngesinkwasodwa.” La ngamazwi akhulunywe ngelinye ixhegu elileminyaka engu-62 lelokitshini leGwabalanda koBulawayo ebelisetheswa icala lokudlwengula umzukulu walo oleminyaka engu-16.
Ixhegu leli esingeke sachaza igama lalo ngenhloso yokuvikela umamangala, kubikwa laqala ukuhlukuluza umzukulu walo emacansini mhlaka 3 Mbimbitho 2021 indaba le yaze yavela kuviki ephelileyo.
Ekhuluma lentatheli kaMthunywa uSilibaziso Ndiweni oyisakhamuzi elokitshini leli, uthe lokhe belesithuli ngesenzo sexhegu leli.
“Silokhu singelamandla ngokuvela kokuhlukuluzwa komntwana nguyisemkhulu lapha elayinini yethu. Kambe nxa uthango solusidla amakhomane kubizwa kuthiweni.
“Ukhulu lo kukhanya waqala ukuganga lokhu ngenyanga kaMbimbitho nyakenye ugogo wakhe aze amtshiye laye ebala.
“Ngenyanga kaMpandula kukhanya waphinda wamngenela njalo endlini yakhe yokulala wamhlukuluza. Umntwana uveze ukuthi ngesikhathi uyisemkhulu emhlukuluza wathi indoda ngeke iphile ngesinkwa kuphela yikho esefuna okunye.
“Umntwana lo uze wabhoboza ithumba leli komunye umama onguSocial Worker ocine emusa emapholiseni,” kulandisa uNkszn Ndiweni.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yabo.
“Amapholisa elokitshini leGwabalanda achwayisisa udaba lwendoda edlwengule umzukulu wayo. Sithanda ukukhuthaza abantu ukuthi kabaziphathe ngendlela etshengisa ubuntu.
Kambe abantu okumele babe yibo abavikela abantwana nxa sokuyibo abaphinda babahlukuluze kulokuthi babanakekele kubizwa kuthiweni? Lokhu akudingi amapholisa ukuthi abhode hatshi kudinga nje ukuziphatha ebantwini.
“Sicela abamabandla, abaphathi bezigaba kanye lomphakathi nje wonke ukuthi ubambisane ekugcineni abantwana,” kuphetha uInsp Ncube.
Online Reporter