admin
Ethel Ncube
AMALUNGISESLELO okuvulwa kwezikolo asesezingeni eliphakemeyo njalo kusiyafika uMvulo abantwana bazabuyela bayefunda endaweni eziphephileyo. Izikolo zivulwa nje ngemva kokuba kunanzelelwe ukuba inani labantu ababanjwa yiCovid-19 liyehla.
Ugatsha lweZemfundo lusebenzelana lolweZempilakahle kanye lokondliwa kuhle kwabantwana ukuze kwenziwe isiqinisekiso sokuthi abantwana bazakube bephephile ezikolo njalo lokuthi kulandelwa imilayo eyakhitshwa nguHulumende kanye lenhlanganiso yeWorld Health Organisation (WHO)
UMthunywa uxhumane lesikhulumi sogatsha lweZemfundo uMnumzana Taungana Ndoro oveze ukuba kukhangelelwe ukuthi kube lezikolo ezimbalwa lapho abantwana abazakube betshintshanisana amalanga okuya esikolo.
“Izikolo ezilabafundi abafika 1 500 kusiyaphezulu yizo ezizabe zitshintshanisa amalanga abantwana abazabe befunda ngawo lokhu kusenzelwa ukuba benelise ukulandela kuhle imigomo yeCovid-19 bengaminyananga.
“Ababhala imihloliso kulezizikolo bona bazabe bebuya nsukuzonke ukuze benelise ukulungiselela imihloliso yabo. Izikolo ezilabantwana abangaphansi kwe-1500, abafundi bazabe behamba amalanga amahlanu,” kubika uMnu Ndoro
Uqhubekele phambili wathi izikolo ezilabantwana abahamba amalanga ambalwa zinlutshwane.
“Ngingathi elizweni lonke jikilele izikolo ezilabantwana abanengi ziyi 1% lezi yizikolo ezifana laboMpopoma High School, labo Kuwadzana School, zimbalwa azizinengi ilizwe lonke yizo ebesikhuthaza ukuba, ukuze abafundi benelise ukuqhelelana abantwana bengabuyi bonke kanye kodwa bakhethelwe insuku zokubuya,” kutsho uMnu Ndoro.
Ubuye waveza ukuba labo abazabhala imihloliso lonyaka balakho ukuhamba esikolo amalanga amanengi kugoqela impelaviki.
“Ababhala imihloliso yabo lonyaka balakho ukuba ngeviki bafunde amalanga ayisithupha ukuze benelise ukugcwalisa isikhathi esadlula bengafundi. Kuzakuya ngezikolo, ukuba zihlela kanjani izifundo zazo,” kutsho uMnu Ndoro. Uphinde waveza ukuba njengoba izikolo zivulwa izulu liyana abantwana abananzelele lapho okulemifula khona.
“Sikhuthaza abafundi ukuba bengazami ngitsho lakancane ukudlula umfula ugcwele kuyamele bahlale umfula uze wentshe. Ngamalanga bengaya esikolo ngenxa yokugcwala komfula mhla behamba ababalisi bayabanika umsebenzi wokubhala ukuze bavale isikhathi abayabe bengafundanga ngaso kubangelwe yikugcwala komfula,” kuphetha uMnu Ndoro.
Online Reporter