Online Reporter
Kingstone Mapupu
GORORO raive rararura kuba rakapakata pfuti nevamwe varo rinobva kudunhu raMambo Mapanzure kuZvishavane rakapihwa chirango chekugara mujeri kwemakore 43 nedare nekuda kwemhosva nomwe dzekuba.
Mutongo uyu wakapihwa nedare reZvishavane Regional Magistrates’ Court apo Witness Mangena (41) wekwaSabhuku Madhibha 2 Village kwaMambo Mapanzure akawanikwa aine mhosva dzekuba akapakata pfuti.
Mutauriri wechikamu chemapurisa chematikitivha eCriminal Investigations Department (CID), Detective Inspector Rachel Muteweri, vanoti mune imwe mhosva yakaparwa naMangena nevamwe vake, avo vasati vabatwa, nemusi wa12 Mbudzi gore rapera, vakapinda pamba peimwe mhuri ndokuvarova nekuvasunga uye ndokuzovabira US$4 000.
“Vakaba mari iyi US$4 000 nemimwe midziyo yakakosha. Vachienderera mberi nekuba nevamwe vake, vakasvika pane mumwe musha ndokuvharira mhuri yepo mumba vachiti vaida mari. Vakazotiza mushure mekunzwa kurira kwepfuti panze,” vanodaro Det Insp Muteweri.
Vanoti nemusi wa16 Mbudzi gore rakapera, vamwe vevanhu vakabirwa vakazoziva Mangena vachibva vakurumidza kutaurira mapurisa.
“Matikitivha eCID ekuZvishavane vakazomhanya kumba kwemurume uyu vachibva vamusunga kuMadhibha 2 Village kwaMambo Mapanzure. Mukufeewa kwenyaya iyi, zvakazoonekwa kuti aiva nedzimwe mhosva dzaisvika nomwe pamwechete,” vanodaro Det Insp Muteweri.
Vanoti Mangena akamiswa pamberi pemutongi Tavengwa Sangstar uye muchuchisi ari Isheanesu Mashayanye nemusi wa25 Kurume gore rino.
“Dare iri rakabva ratura mutongo wekuti agare mujeri kwemakore makumi mana nematatu apo makore mashanu akasendekwa parutivi nekuda kwehunhu hwakanaka nekudaro achapika makore makumi matatu nemasere,” vanodaro Det Insp Muteweri.
Mapurisa vari kukumbira kuruzhinji kuti vawaniswe mashoko anoita kuti vagone kusunga mamwe makororo arimo munyaya yekuba pamwechete nemurume uyu.
“Tinokumbira kuruzhinji kune vanoziva mamwe makororo aiba naWitness Mangena kuti vazivise chero mapurisa vari padyo navo kana kushandisa masuggestion boxes akatekeshera nenyika. Igaroziva kuti mhosva haibhadhare uyewo hairovi, ukaipara unosungwa chete wopihwa zvirango zvinofambirana nemhosva yako,” vanodaro Det Insp Muteweri.
