Online Reporter
Kingstone Mapupu
GORORO rainge rarura nekubira vatyairi vedzimotokari rakapakata pfuti pamugwagwa rakazobatwa rakavhumbama pakati pemunda wechibage mushure mekunge rahwanda apo raive rabira mumwe mutyairi US$50 kuBulawayo.
Mbavha iyi yakakwidzwa motokari nemumwe mutyairi apo yakanyepera kuita semunhu ari parwendo pamugwagwa asi ndokuzoburitsa pfuti ikatyisidzira mutyairi uyu ichiti inoda mari ndokupihwa US$50.
Mushure mekupihwa mari iyi, tsotsi iri rakabva ratiza rikanohwanda pakati pemunda wechibage.
Mutauriri wemapurisa echikamu chematikitivha cheCriminal Investigations Department (CID), Detective Inspector Rachel Muteweri, vanoti nyaya iyi yakaitika nemusi wa9 Chivabvu.
Vanoti gororo iri rakamisa motokari yemumwe murume richiita serinoda kuenda parwendo.
“Gororo iri rakamira pamugwagwa ndokumisa motokari yerudzi rweHonda Fit yaifamba nemugwagwa waWellington kuBellevue kuBulawayo. Ratakurwa nemotokari yaityairwa nemumwe murume rakabva raburitsa pfuti ndokunongedzera kumutyairi uyu. Akabva amuti amupe mari,
ndokuzopihwa US$50. Mbavha iyi ichibva yaburuka mumotokari ichimhanya ndokunyangarika nemurima nemukati memunda wechibage,” vanodaro Det Insp Muteweri.
Vanoti panguva iyoyo mutyairi wemotokari aiva abirwa uyu, akaunganidza vamwe vanhu munharaunda iyi ndokupinda mumunda wechibage waiva padyo ndokutanga kutsvaga gororo iri apowo nyaya iyi yakabva yamhan’arwa kumapurisa.
“Matikitivha neveruzhinji vakazopinda muchibage umu ndokuwana gororo iri rakavhumbama pakati pemunda wechibage richibva rasungwa. Akawanikwa aine pfuti yerudzi rweBlow F92 9mm Callibre yaisava nemabara,” vanodaro Det Insp Muteweri.
Vanoti mukufeewa kwenyaya iyi, pakabuda dzimwe mhosva nomwe dzekubiwa pachishandiswa pfuti muBulawayo.
Pane imwe mhosva yakaparwa nemusi wa19 Kubvumbi panosangana mugwagwa waNketa Drive naMasiyapambili Drive kuBulawayo.
“Nemusi uyu, murume mumwechete uyu anonzi akamira pamugwagwa achiita seanoda kutsvaga motokari yekufambisa rwendo. Anonzi akazoburitsa pfuti ndokubira vanhu vaiva mukombi yaakakwira pamwechete nevashandi vemukombi iyi mari yose yavaiva vaswera vachitakura vanhu,” vanodaro Det Insp Muteweri.
Vanoti gororo rimwechete iri nemusi wa18 Kubvumbi nenguva dza8:30 manheru, rakaenda kumutyairi wetekisi aiva akamisa motokari yake panosangana mugwagwa waLobengula Street na8th Avenue kuBulawayo apo aive akamirira makasitoma ake.
“Akataura nemutyairi uyu kuti aida kutakurwa kuendeswa kuBellevue achibva azoburitsa pfuti vava mumugwagwa. Usiku hwakare uhwu, gororo iri nenguva dza2350 hours rakaenda rikanobira zvakare mumwe mutyairi aiva nemotokari yake nemutowo mumwechete,” vanodaro Det Insp Muteweri.
Mushure mekusungwa kwegororo iri, mapurisa vakawana nhare dzakawanda.
“Semapurisa, tinoramba tichikurudzira vatyairi vedzimotokari kuti vasatakure vanhu vavasingazive sezvo zviine dambudziko rekuti vanogona kutakura makororo nemhondi panguva imwechete vobirwa mari yavo kana dzimotokari dzavo uyewo nekugumisira vauraiwa,” vanodaro Det Insp Muteweri.
Vanoti nyaya dzevatyairi vari kubirwa motokari dzavo nekukuvadzwa nematsotsi dziri kuwanda munyika.
