adminSalibonani bafundi ngithemba liqhuba kahle kuzifundo esikolo. Singakakhangeli isifundo sethu akengilikhumbuze ngemithetho yesikolo. Isikolo sinye ngasinye silemithetho yaso ethize okumele siyilandele. Imithetho le bafundi yenza sihlalisane kuhle esikolo njalo ithuthukisa ukuhleleka kumbe singathi yenza kube le-order ngesilungu.
Kuqakathekile ukuba siyilandele bafundi ukuze sifunde kuhle.
Isihloko sesifundo sithi inzwisisa.
Iyini inzwisisa? Kungaba yincwadi, inganekwane noma indatshana okumele umuntu ayibale andubana aphendule imibuzo mayelana ngalokho akubalileyo. Nanzi-ke izinto ezimqoka okumele sizenze ukuze sanelise ukuphendula imibuzo yenzwisisa ngendlela elohlonzi.
1. Qala ngokubala imibuzo yenzwisisa, lokhu kuzenza ube lesazela ngokumunyethweyo ngaleyi indaba njalo kuzenza uzwisise ngokumele ukwenze.
2. Bala inzwisisa ungajahi. Ukubala ujahile kwenza umuntu akhuthe okunye okumqoka kwenzwisisa ngakho ukubala ungajahanga kwenza uzwisise okubalayo.
3. Phendula imibuzo ngokugcweleyo, lapho kumele ukuba uqale ngokuloba amabala athize ombuzo ubusubambanisa lempendulo yakho. Ake sibuyele njalo kusibonelo sethu.
4. Phendula imibuzo udinga impendulo endabeni. Endabeni kulemitsho loba iziqendu ezihambelana lalokhu okubuzwayo. Kuqakathekile ukuba sidinge leyo mitsho loba lezo ziqendu ngoba yizo ezimumethe impendulo.
Isibonelo: Asithi endabeni kulomutsho othi “UDumolwamadoda wabotshwa ngamapholisa egqekeze esitolo sako Ntuli”, umbuzo-ke ubususithi uDumolwamadoda wabotshelwani, lumutsho uyasitshengisa ukuba uDumolwamadoda wabotshelwa ukuntshontsha esitolo. Nanzelela eminye imibuzo ayidingi impendulo endabeni, idinga ukuba uzicabangele impendulo usebenzisa ukuzwisisa kwakho indaba loba indatshana njengalokhu “indaba kaDumolwamadoda isifundisani?” Lapha omunye ngokuzwisisa kwakhe sengathi “indaba kaDumolwamadoda isifundisa ukuba ubusela bubi”. “UDumolwamadoda wabotshelwani?” Indlela eqondileyo yokuphendula lumbuzo ithi “uDumolwamadoda wabotshelwa . . . “ ubusubambanisa ke lempendulo yakho.
5. Sebenzisa impawu zolimi eziqondileyo kuzimpendulo zakho, lezi zigoqela ukusebenzisa ibala elikhulu ekuqaleni kwemitsho lasekuqaliseni kwebizo lomuntu loba ibizo lendawo uNgqe, uKhefu njalonjalo.
Sihlangane njalo kwelizayo bafundi.
Online Reporter