admin
Thokozile Mbedzi
ZILOKHE zikhakhamele izakhamizi zeMadlambudzi esigabeni seBulilima ngesenzo sabontanga sokuzama ukubamba esinye isalukazi (82) inkunzi ngokusibhaxabula kabuhlungu okubangele ukuthi sife.
Kubikwa uMaina Moyo oleminyaka engu-82 ukhuthuzwe lixuku labantwana abancane okungasatholakalanga iminyaka yabo yokuzalwa bambulala bedinga imali.
Kuvele ukuthi abantwana laba bacabangele ukuthi ugogo lo ulemali okubangele ukuthi bamhlasele ngokumtshaya ngezigodo langensimbi ngapha bembophe ngentambo.
Ekhuluma lentatheli kaMthuywa omunye wezakhamizi zakulindawo uNkosazana Awakhiwe Mpunzi uveze ukuthi kalankani ngontanga laba ababe lesibindi sokubulala ugogo uMaMoyo ngoba becabangela ukuba bazathola imali.
“Ngimadolonzima ngilapha ngesenzo sabantwana laba abancane kangaka ababelesibindi sokubulala ugogo ongaka bengesabi ukuba bazokhela abazali babo uzimu, phela abantu bakudala badla izihlahla ezinzima. Lokhu akusoze kuphethe kodwa ezimulini zabantwana laba ngiqinisile, ngaphandle kube lokwenziwayo loba bahlawule.
“Selokhu ngathwetshulwa yingwe angikaze ngizwe loba ukubona lokhu engikubone esigabeni sethu. Mina ngazi abantwana bengabantu abesabayo njalo abathanda ogogo kodwa lokhu okwenzakeleyo asazi ukuthi abantwana laba bebengenwe yini.
“Le yinsindabaphenduli, lawo amadlozi esigaba ngethemba azondile njalo sizakhangelana njani singomakhelwane labantwana laba. Phela ngontanga abazahle bakhule belezandla ezigcwele igazi, angiboni bezalunga futhi empilweni zabo,” kulandisa uNkszn Mpuzi.
Omunye wabomakhelwane njalo uMnumzana Simon Dube ubike ukuthi behlelwe lihlazo esigabeni sabo ngoba abadala bengumthunzi kuye wonke umuntu kungakho-ke okwenziwe ngabantwana laba abalokhu besanuka uchago emakhaleni kuyethusa.
“Sehlelwe lihlazo esigabeni sethu, lapha thina sazi abadala bengumthunzi kuye wonke umuntu. Kuyethusa ukuba abantwana laba bangenwe ngumoya bani wokuba babulale umuntu omdala kangaka. Wonke umuntu esigabeni umangele, asazi lokuthi sikuthini ngoba abantu nxa sihlezi esigabeni sesiyizihlobo, asikhangelelanga ukuthi kube lokulimazana loba ukubulalana njengalokhu okwenzakeleyo,” kutsho uMnu Dube.
Isikhulumi samapholisa ezweni lonke uAssistant Commissioner Paul Nyathi ebuzwa ngodaba lolu uvumile ukuthi lwenzakele wengezelela wathi basaluchwayisisa.
“Udaba lukagogo obulewe ngabantwana abancane silalo njalo kucatshangelwa ukuthi bangabe bebekhokhelwa ngabanye abadala kodwa konke lokhu kuzacaca ngemva kokuphenya esikwenzayo.
“Okwakhathesi ngeke ngiveze okunengi ngalelicala kodwa ngithanda ukukhuthaza abatsha ukuba balandele imithetho, baziphathe ukuze izehlakalo ezifana lalezi zenqabeleke,” kuphetha uAsst Comm Paul Nyathi.
Online Reporter