admin
ABANTU sebangenwa kuyini kanti kulezi insuku? Inhlonipho lokuzithiba akusekho kuzulu okuyinto esilethe ubutshapha empilweni zabantu.
Kulihlazo elingakanani ukubona abantu abasebenza bonke ikakhulu abasezikhundleni zobumaneja bekhombisa izisebenzi zabo.
Akukhathalekile ukuthi yindoda ekhombisayo kumbe ngumfazi, konke sekufana nje.
Yebo ye, abantu bengathi akulacala ukuthi kukhonjiswane emisebenzini kodwa iqiniso yikuthi nxa umuntu olesikhundla ekhombisa isisebenzi sakhe akujwayelekanga kusisebenzi ukuba sale ngoba lokhu kutsho ubunzima emsebenzini. Angeke emxotshe khonapho kodwa into ekhona yikuthi mzukwana esenza iphutha umsebenzi usuphelile.
Kanti khona vele kungani abantu bekhombisana emsebenzini, kwehlulani ukuthi bahloniphane?
Okunye njalo yikuthi nxa kungavunyelwananga kuloludaba kutsho ukuthi akusela kuzwanana lakancane njalo lokhu kubulala loba yiphi inkampani.
Kuzwisa ubuhlungu ukubona amadoda ethwele amaluba lokunye ukudla okutshiyeneyo ngezikhathi zokudla kwemini bephathele amadlecatsha abo emisebenzini kulokuthi izinto lezi ziqonde ezindlini. Kabame ukunamathelana lezingane ezincane emisebenzini.
Abantu kabame ukukhombisana emisebenzini ikakhulu omaneja labaqondisi abangamadoda ukuze lokumamatheka komkhuhlane wengculazi kwenqatshelwe.
Kusegcekeni phela ukuba okungamantombazana khonokho okukhonjiswayo kuyabe kulamajaha akho abavele bethandana kuthi ngenxa yokuthanda umsebenzi kumbe ukwesaba ukuphelelwa yiwo, besekukhomba umaneja.
Imizi iyadilika khathesi ngenxa yobutshapha obenziwa emisebenzini mihla yonke kungela ozama ukuvimbela lokhu.
Kanti khona vele kungavinjelwa njani kusenziwa yibo abantu okumele bekumise, omaneja phela.
Inhlanganiso zabomama lazo kazibone ukubana udaba lolu ziyaluhambisa phambili ikakhulu kuziphathamandla zikaHulumende. Okunye okungenziwa yikuthi lazo izisebenzi kazicebele labo abakwenzayo ukuze kube yisibonelo kibo bonke abalomcabango onjalo.
Abantu kabalande ukusebenza emisebenzini hatshi ukuzokhombisa kumbe ukukhonjiswa.
Kuyonale iviki omunye umehluli womthethwandaba omkhulu uveze ukuba sekumele kube loluhlu lwabantu bonke abatshadileyo ngoba sekukanengi abantu bezenza abangatshadanga ngoba sebethatheka ngamadlecatsha.
Bantu bakithi sesingenwe kuyini kanti sisenza ihlazo elinjalo? Akusiqiniso na ukubana umuntu osebenza laye ufana lodadewenu kumbe umnewenu ngoba phela utshona laye kusukela ekuseni kuze kube ntambama?
Pho-ke umuntu onjalo uzabe usumhawukela njengomfazi njani?
Bomaneja kanye labosomabhizimusi yekelani ukusebenzisa imali kanye lezikhundla zenu ukuthi likhonjwe yizisebenzi.
Abanye sebehlala belemihlangano engapheliyo ngaphandle kwemadolobheni abasebenzela kiwo ukuze bazuze ithuba lokuba lezithandwa zabo.
Bakithi emisebenzini asihloniphaneni sime ukukhombisana ikakhulu omaneja labosomabhizimusi. Lani bomakhonjiswa akelizinuke amakhwapha libone ukuthi liyasetshenziswa kuphela.
Online Reporter