adminYiNtatheli kaMthunywa
UHAMBO lokuyadlala kuma-Olympics lwalungeluhle kuqembu lamantombazana amaMighty Warriors. Kuyaziwa ukuthi amalungiselelo kazange enele, njalo abadlali baphiwe imali engatsho lutho ngokuphatheka kulumqhudelwano wamazwe.
NgoLwesibili kuliviki iZimbabwe idlale umdlalo wayo wokucina kulumncintiswano kusegcekeni ukuthi akulalutho oluzaphuma kulithimu. Kuphelile obekulandwe edolobheni leRio de Janero eBrazil kumqeqetshi uShadreck Mlauzi labadlali bakhe.
IZimbabwe ibincintisana leGermany, Canada leAustralia kuqula lika-F, kusigaba sokuqala sokukhankasela imendulo zama-Olympics.
Kumdlalo wangoLwesibili, amaMighty Warriors anqotshwe 6-1 yisizwe se-Australia. Kweminye imidlalo, iGermany yenza umathanda yanqoba 6-1. Amantombazana eCanada lawo azinqobela kalula nge-3-1.
AmaMighty Warriors enelisa ukuthi ahlohle kuyo yonke imidlalo.
Kolunye udaba kuma-Olympics njalo, uKirsty Coventry, othenjiweyo esizweni kumdlalo we-swimming wehlulekile ukuthi afinyelele ukuncintisa kumango we-100m backstroke.
“Bengifuna ukuncintisa ku-final ye 100m backstroke kodwa kwehlule,” kutsho uCoventry ku-Instagram.
Kumbiko wakhe wokubonga isizwe ngosekelo abalutholileyo, umqeqetshi uMlauzi uthe babesazi ukuthi abasoke banqobe ngitsho umdlalo owodwa.
“Besidlala lamazwe aqinileyo kunguqu yamantombazana. Amazwe la alungiselela aphelela kukanti thina asizange sithole ukuzwisisa ukuthi iGermany, iCanada leAustralia zidlala inguqu enjani.
“Ngithanda ukutshayela abadlali bami bonke ihlombe ngoba ukufika kwabo kuma-Olympics kufake inguqu yeZimbabwe emlonyeni yabanengi kulomncintiswano. Sithole usekelo kuzizalwane zamanye amazwe. Kusukela lapha, sekumele siqale ukudlala ibhola elizasenza sibe zintshantshu eAfrica,” kutsho uMlauzi ekhuluma loMthunywa ebulenjini.
Isikhulumi senhlanganiso yeZimbabwe Football Association uXolisani Gwesela ubike ukuba amaMighty Warriors akumelanga kuthiwe anqotshiwe ngoba ukufika kwawo kuma-Olympics kuncoywa ukwedlula konke.
“Siyajabula ngosekelo lwabalandeli bomdlalo wenguqu abakhuze amaMighty Warriors kuma-Olympics eRio. Sizizwa sithobekile. Lanxa sinqotshiwe, okusithabisayo yikuthi amantombazana ethu ebeqalisa ukuyadlala kuma-Olympics.
“Khathesi sesikhangele ukulungiselela umkhankaso wemidlalo yeAfcon yamantombazana eseCameroon,” kutsho uGwesela.
Online Reporter