adminUJOSE Mourinho loClaudio Ranieri sebekhweze ukungezwani kwabo enkundleni yenguqu nanko akula phakathi kwabaqeqetshi laba ovuma ukwedlulwa ngomunye.
UMourhino weManchester United uqhubeka ngokuthi uRaineri uyisehluleki, ikanti umqeqetshi weLeicester uthi uzatshengisa ubungcitshi bakhe mhla zombili zidibana.
Umqeqetshi omutsha weMan U uzibona esethubeni elihle lokuwina inhliziyo zabalandeli beManchester United nxa enganqoba isicoco sakhe sokuqala njengomqeqetshi waleliqembu lase-Old Trafford.
Phakathi kwawo wonke amaqembu, uMourhino ukhangelelwe ukuthi agiqane lentshantshu zeligi iLecester lomqeqetshi wayo uClaudio Ranieri. ILeicester yiyo egile izimanga ngokuthwala inkezo yeligi yeBarclays.
Ama-Red Devils adlule lesicoco seFA Cup ngokwehlula iCrystal Palace esalolongwa nguqweqwe womqeqetshi waseNetherlands uLouis van Gaal, owakhitshwa emsebenzini, indawo yakhe yathathwa nguMourinho wasePortugal odume ngelithi “The Special One”.
UMourinho uchithe inyanga ezinhlanu ezikhotha amanxeba ngemuva kokukhonjwa indlela yisiqumama sesikhulu seChelsea uRoman Abramovich ngoMpalakazi ngemuva kwempumela engazange ithokozise.
URanieri yena uhlalelwe yingcindezi yeqembu lakhe ebelidume ngokuvika izembe phambilini. Umqeqetshi lo ulwela ukugcina abadlali abafana loRiyaad Mahrez wase-Algeria ofunwa uthuli yi-Arsenal loDanny Drinkwater. Okwamanje sekuhambe uN’Golo Kante kuChelsea nge-£32 million.
“Iqembu lisebenza ngokuzikhandla, ngicabanga ukuthi abadlali bafuna ukuqhubeka leqembu bazame ukwenza okukhulu kulalokho esakwenza ngesizini edluleyo,” kuchaza uRanieri exoxa lephephandaba lase-England iDaily Mail.
“Siyazi kuzoba nzima kodwa siyilambele impumelelo. Kubalulekile ukuthi basayine izivumelwano ezintsha, bahlale lathi ukuze bathole ithuba lokudlala kuChampions League,” kuqhuba uRanieri.
Phakathi kwayo yonke imidlalo, abalandeli benguqu eNgilandi bethatha iCommunity Shield njengomdlalo wobungane ngaphambi kokuqala kwesizini entsha.
Umbango phakathi kukaMourinho loRanieri umdala kwazise kuzokhunjulwa ukuba umqeqetshi wasePortugal wathatha isikhundla sikaRaineri ngo-2004. URanieri wayekade ephume indawo yesibili ngesikhathi elolonga iChelsea eyatshiywa i-Arsenal ngaleyo sizini.
Ngemuva kwalokhu, uMourinho uke wabiza uRanieri njenge sehluleki somqeqetshi.
“Ngo-2004 ngesikhathi ngifika ku-Chelsea ngibuza izikhulu ukuthi kungani ngithathe isikhundla sikaRanieri, ngatshelwa ukuthi kungenxa yokuthi iqembu selifuna ukuthola izicoco,” kutsho uMourinho owayekhuluma leDaily Mail. -Ubulembu
Online Reporter