Online Reporter
YiNtatheli kaMthunywa
LONYAKA kukhulu okuzayo okuzavela kuqembu leSunduza Dance Theatre, njengoba lithakazelela iminyaka engu-40 lijabulisa umphakathi ngamaphimbo lemigido yomdabu.
Ukuze lithakazelele kuhle ukufikisa iminyaka yonke le, iSunduza Dance Theatre ihlele ukwenza i-documentary ngembali yayo, kusukela mhla isungulwa.
Umqondisi weqembu uCharles Mahlaba ubikele iphephandaba likazulu ukuba baphezulu kokulungiselela ilanga labo elikhulu, ngakho ukukhumbula labo abasungula iqembu kumqoka kibo.
“Okwakhathesi sihlose ukwenza i-documentary, siqoqa ngembali yeqembu, sikhangele labo okuyibo abalisungulayo, njengoba sithakazelela ukufikisa iminyaka engu-40.
“Sizabuyela emuva sikhumbuzane ngabasunguli abakhulu abagoqela u-Elijah Mbambo, Misheck Moyo, Simon Banda, Jomo Lunga, Sandile Lugodlo, Simon Mbambo, Polite, Jeys Marabini, Baphi Fafaza Mdladla, Collen Mabuya, Bekithemba Sibanda loprojusa, uPhilip Weis.
“Siyaqhubeka njalo sibonge uSotsha Moyo oweBlack Mfolosi, Albert Nyathi, Vusa Mkhaya leNsingizi), Ramadu Moyo,
Thulani Mbambo, Lwazi Tshabangu, Saimon Mambazo Phiri labanye abanengi, esingeke sabaqamba bephelele. I-documentary le izatshengisa lapho esisuka khona, lohambo esilwenzileyo kuminyaka edluleyo,” kutsho uMahlaba.
Uthe bazafuna ukuthi basabalale amazwe betshengisa imidlalo yabo.
“Kwelakusasa, sifuna ukuthi sihambise imidlalo yethu enkundleni zaphetsheya. Sahlaselwa yikumemetheka kweCovid-19, eyavala imidlalo yethu losekelo lokuthi sivakatshe.
Khathesi sifuna ukuthi siqine ngokuvula amathuba la, iSunduza ikhuphuke hatshi kwelakithi, kodwa lasemazweni aphetsheya.”
ISunduza Dance Theatre idume ngemidlalo yayo ethi, Matata, Injabulo 2000, Voices from the Rocks, The Other Cecil le-Adventures of Robert Moffat.
