Online Reporter
Zimpapers Arts and Entertainment Hub
MUIMBI ane mukurumbira mumisambo inoti hip-hop uye urban grooves, Desmond Tambawoga Chideme, uyo anonyanya kuzivikanwa saStunner, anoti ari kushungurudzika nekuimbwa kwakaitwa kambo kake “Godo” padopiro richangobva kuitwa re24th National Arts Merit Awards (NAMA) naBaShupi, pasina mvumo yake.
Dopiro reNAMA rakaitirwa kuHarare International Conference Centre neMugovera wadarika pamberi.
Achinyora padandemutande reFacebook, Stunner akashoropodzawo varongi vechiitiko ichi nekubvumidza kuimbwa kwekambo kake, ako akaburitsa makore 14 adarika, pasina kutaurwa kuti kakabva nekupi uye kakaimbwa naani.
“Asi Nama painofonera munhu asiri muridzi wekambo, chiiko chinenge chichimboitika? Hamungaimbi ‘song’ yangu ndichiri mupenyu padopiro rakakura kudai, pachiitiko chikuru chakadaro, mobva maita zvakadaro musingazivi kwakabva nekambo aka,” anonyora achidaro Stunner.
Stunner anoti anoshungurudzikawo kuti BaShupi havana kubuda pachena vachitaura kuti ndiye akaimba kambo aka paaikatevedzera kuNAMA.
“Muchinda (BaShupi) wakatadza kana kudaidzira kuti Stunner pawaiimba kambo kausina kana kunyora? Sununguka kukashandisa kana uchinzwa sokudaro zvakare mune ramangwana, asi remekedzawo vamwe,” anodaro Stunner.
Stunner, uyo anozvishambadza achiti “#TheLastRealG” uye “#RapperWekupedzisira”, anoti kuimba padopiro renyika rakafanana neNAMA zvakasiyana nekuimba muimba yekunwira kana pashoo yevoruzhinji, achisimbisisa kuti zviitiko zvakadai zvinoda kupihwa mvumo pamwe chete nekuremekedzana.
