shloboe boe
Siphathokuhle Ngulube
Salibonani bafundi. Ngithemba alikhohlwanga ukusebenza nzima lanxa likukhefu. Yebo kuqakathekile ukuphumula kodwa linanzelele phela ukuthi ekuvulweni kwezikolo imihloliso layo iyabe isisondele.
Sikhangelile izichwayisiso zethu saze sayafika ekucineni. Kuleli iviki ngifisa sinanzelele indlela okukhangelelwe ukuba izichwayisiso zethu zithwetshulwe ngayo.
Okumele sikunanzelele bafundi yikuthi asikhangelelanga ukuba singenzi kuhle kuzichwayisiso zethu ngoba phela ngumsebenzi ebesiwenza ndawonye lombalisi njalo umsebenzi lo siwenze iminyaka emibili yonke ngoba phela siqale nyakenye.
Okokuqala engifisa sikunanzelele yikuba izichwayisiso zethu zilemiklomelo engamatshumi amahlanu (50). Ngithemba siyananzelela sibili ukuba yimiklomelo eminengi le okungamelanga siyilahlele phansi ngoba phela izahamba ihlanganiswe leminye imiklomelo ezavela kumaphepha ethu womabili awemihloliso esizayibhala.
Imiklomelo le engamatshumi amahlanu yehlukaniswe ngezigaba ngezigaba.
Isigaba sinye ngasinye silemiklomelo yaso.
Kusigaba sakuqala kukhangelelwe ukuba siqambe ingxaki, sichaze uhlupho ngamafitshane, sichaze njalo ngamafitshane indlela esikhangelele ukuba sizaxazulula ngayo udwetshu kanti njalo sibuye siqambe izinjongo zomsebenzi wethu.
Konke lokhu esesikukhulumile kukhangelelwe ukuba kusiphe imiklomelo emihlanu (5 marks) Sikhumbule phela bafundi ukuba ukuze sithole le imiklomelo kufanele ingxaki yethu iqanjwe kahle njalo ibuye yelulwe kahle.
Nxa sisuka kusigaba sakuqala siya kusigaba sesibili. Lapha sitshilo ukuba kukhangelelwe ukuba uchwayisise kabanzi udinge imibono ehambelana lesihloko sakho.
Iyadingakala imibono etshiyeneyo evela ezindaweni ezahlukeneyo ukuze phela uphume lempumela ebambekayo.
Isigaba sesibili silemiklomelo elitshumi (10).
Dinga phela ulwazi olubalulekileyo.
Ungadinga lemifanekiso ukuze kuvele kahle lokho ochwayisisa ngakho. Ngeke uyithole imiklomelo elitshumi nxa ungaluvezanga kuhle ulwazi ngesihloko sakho.
Isigaba sesithathu laso sibalulekile kakhulu ngoba silemiklomelo eminengi njengesigaba sesibili. Isigaba sesithathu silemiklomelo elitshumi (10).
Isigaba sesine laso silemiklomelo elitshumi (10).
Lapha umfundi useveza afuna ukukwenza, nxa efisa ukubumba okuthile sekuzavela ke ebumba lolo lutho. Uzakwenza ngesigaba ngesigaba aze ayefika emaphethelweni.
Kusigaba sesihlanu umfundi usebukisa lokho akade ekwenza.
Nxa ekade ebumba okuthile kusigaba sesihlanu sekuphelile sekubukiswa.
Lapha ke kulemiklomelo elitshumi njalo (10).
Lesi isigaba silemiklomelo emihlanu (5).
Kuhle ke bafundi siyinanzelele imiklomelo le ukuze nxa sichwayisisa sikwazi okukhangelelwe ngulowo ozahlola umsebenzi wethu.
Asiqhubekeni ngeviki ezayo.
Online Reporter