Online Reporter
Siphathokuhle Ngulube
Salibonani bafundi. Ngithemba liqhuba kahle ezifundweni zenu njalo amaprojekithi seliwagqiba, phela umnyaka usuphelile bafundi. Kumaviki amabili edluleyo sigxile kakhulu kusigaba sesine eseprojekithi yethu. Lapha sigcizelele khona ukuthi kulesi isigaba kukhangelelwe ukuthi wenze ulutho olubambekayo ngesihloko sakho.
Lapha ungenza amagwaliba aveza lokho obuchwayisisa ngakho, ungabhala umbiko, ungabumba okuthile ngezandla zakho. Asithi ubuchwayisisisa ngokuphekwa kokudla kwesintu kulesi isigaba, usungaveza ngokugcweleyo ukuphekwa kokudla okuthile kusukela ekuqaleni kuze kuyefika emaphethelweni.
Kulesi isigaba usungazithatha imifanekiso usenza lokho okukhethileyo. Asithi yikupheka ukudla, sesingabona imifanekiso yakho kusukela ekuqaleni upheka lokho kudla uze uyefika ekucineni. Lokhu kuzakwenza isichwayisiso sakho sibe lesisindo ngoba phela kukhanya ukuthi nguwe kanye ophume lalokho okuzaphuma ekucineni.
Kule iviki sizakhangela isigaba sesihlanu. Lesi isigaba silobudlelwano kakhulu lesigaba sesine ngoba phela khonokho obukwenza kusigaba sesine yikho osukubukisa kusigaba sesihlanu. Asithi ubuchwayisisa ngezindlela zokupheka ukudla kwesintu esezitshabalala, usungaveza lokho kudla osuke wakhetha ukukupheka kusigaba sesine. Lapha ususivezela ukudla sekuphekiwe kwavuthwa sekulungele nje ukudliwa.
Ungaveza abanye abaseduze kwakho sebesidla bekholisa lokho kudla. Abanye njalo kulesi isigaba bangakhetha ukubukisa umsebenzi wabo besebenzisa amagwaliba. Asithi ubuchwayisisa ngemithi yesintu lalokho okwelatshwa yileyo mithi. Usungadinga imithi yesintu etshiyeneyo uyinameke egwalibeni ube ususitsho ukuthi leyomithi isebenzani. Kusigaba sesihlanu usungabukisa ke lelo gwaliba seliphelele, liveza leyomithi.
Ekuphekeni ukudla okutshiyeneyo sungabukisa ibhukwana (recipe book) eliveza izindlela ezitshiyeneyo zokupheka lokho kudla. Ibhukwana liyabe lilungiswe kuhle, liveza ukudla okutshiyeneyo Kanye lezindlela lokho kudla okuphekwa ngazo. Sungadinga lemifanekiso yalokho kudla uyinameke ngaphansi. Lesi yisigaba esimnandi bafundi ngoba siveza khona kanye obuchwayisisa ngakho kusukela ekuqaleni.
Ukwenza kwakho kuzavela kakhulu kusigaba sesine kuthi impumela yokwenziweyo ivele kusigaba sesihlanu. Lapha kulesi isigaba kuyadingeka ukuba usebenzise ubunono obukhulu ukuze phela kuvele ukuthi ulutholile ulwazi ekuchwayisiseni kwakho. Asithi uthe uzabumba impahla yesintu ethile, kayiphume iyinto enhle ezahuga labantu abanengi ekuyisebenziseni.
Ngithemba siyavumelana ukuthi isigaba sesihlanu sitshiphile njalo simnandi nje ngoba ukubukisa kuvele kumnandi. Kufanele sizigqaje ngezichwayisiso zethu bafundi. Singenzeli nje ukuthi sedlulise kodwa hayi senze ngezinhliziyo zethu zonke ukuze kuvele kahle lokho ebesifuna ukukuveza.
Asiqediseni izichwayisiso zethu ukuze phela siqalise ukulungiselela imihloliso singaselamthwalo emahlombe ethu. Asihlanganeni ngeviki ezayo sesigqiba amaprojekithi ethu lapho esizakhangela khona isigaba sesithupha esiyiso esokucina.
