Online Reporter
Ethel Ncube
ABALIMI sebexwayiswe ukuba bavikele inkukhu zabo emqandweni ukuze zingafi njalo zingabi le-stress esibangelwa ngumqando.
UMnumzana Gerald Dube oyingcitshi ekufuyeni inkukhu lengulube oveze ukuthi umqando awukapheli njalo kuliviki umqando uzabe umkhulu kungakho abalimi kumele bavikele inkukhu zabo.
Ekhuluma lentatheli, uMnumzana Gerald Dube uthe umqando ulomthelela omubi enkukhwini.
“Inkukhu zingangenwa ngumqando zilakho ukuba zife kumbe nxa zingafanga zilakho ukuba zingakhuli kuhle okucina kubangela ukuthi umlimi alahlekelwe zindleko zakhe nxa abantu bengasazithengi ngenxa yokungasuthiseki ngazo.
“Isilugu kumele sikhudumale sonke kungaze kwangena umqando phakathi,” kutsho uMnu Dube.
Uthe abalimi bangabasa umlilo babe sebefaka amalahle esilugwini ukuze kukhudumale inkukhu zingangenwa ngumqando.
Uqhubekele phambili eveza ukuba enye indlela yokukhudumeza isilugu yikufaka izibane ezikhudumeza lapho okulenkukhu khona.
“Enye indlela yokukhudumeza isilugu sakho nxa ungelambawula yikuthi umlimi athenge izibane. Izibane lezi kuthiwa ngama-infra-red light. Izibane lezi ziyalengiswa phezulu ukuze zikhudumeze isilugu sonke.
“Umlimi kumele ananzelele ukuthi ekulengiseni kwakhe izibane lezi, zingabi duzane lezinye izinto ngoba zilakho ukuthi zitshe.
“Ukuze ubone ukuba kuyakhudumala kumbe akukhudumali ubona ngenkukhu, nxa kukhudumala aziminyani kodwa nxa kungakhudumali ziyabuthana ndawonye zizama ukuba zikhudumezane,” kuchasisa uMnu Dube.
Uphethe ngokukhuthaza abalimi bonke abafuye inkukhu ukuthi babone ukuba izilugu zabo ziyakhudumala ukuze inkukhu zikhule kuhle.
