Online Reporter
Ethel Ncube
KULENDODA yeZhombe ehlelwe ngamashwa ngempelaviki nanko isuke emzini wayo isiyakosa inyama ezitolo kanti ibilanda ukuyakufa.
UPaul Herbert okungasatholakalanga ukuthi uleminyaka emingaki kubikwa wayesosa inyama phezulu kwe-braai stand ezitolo zakoHove ngephutha kwawa inyama kaTinashe Mazanhi owahle wamgwaza wafa.
Kuvele ukuba uMazanhi ebona inyama yakhe isiwele enhlabathini kazange abuze ekunengi kodwa wakhipha i-Okapi esikhwameni wagwaza uPaul esifubeni andubana adliwe ngumswenya.
Loba baphanga bamgijimisela esibhedlela bathi befika odokotela bathi uPaul usedlule emhlabeni.
Isikhulumi samapholisa eMidlands uInspector Emmanuel Mahoko uqinisekise ngesehlakalo lesi.
“Sidinga umetheswacala uTinashe Mazanhi osolwa ngecala lokugwaza abulale uPaul Herbert.
“Kucatshangelwa ukuba uHerbert wathi ephakathi kokosa inyama wasewisa inyama kaMazanhi owahle wamgwaza wafa.
“Sicela uzulu ongabe esazi lapho okungatholakala khona uTinashe Mazanhi abikele amapholisa aseduzane laye,” kubika uInsp Mahoko.
Uphethe ngokuxwayisa uzulu ukuthi atshiye umkhuba wokusebenzisa udlame nxa kulokuphambanisana phakathi kwabantu.
